由 2020 年 1 月起，喺 Steam 上面開始搶先體驗測試，有「多人連線版 Pokemon」之稱嘅《Temtem》，經過兩年時間仍然有「極度好評」評價。呢款出色嘅作品終於要脫離測試階段，官方早前正式宣佈會喺 9 月推出正式版遊戲，並且於多平台發售。

《Temtem》由西班牙遊戲團隊 Crema 開發，係一款大型多人連線 MMORPG，採用回合制戰術。遊戲喺 2018 年時於 Kickstarter 上集資，最終以目標 8倍以上嘅金額 $57.3 萬美元達標。遊戲本身參考咗大量《Pokemon》元素，不但風格相似，連著名劇情「三揀一」、草叢遇上小精靈、宿敵、道館等等亦都一應俱全。喺戰鬥設定上，小精靈同樣有屬性相剋、只能攜帶四招、馴服、培育等設定。

《Temtem》以「多人連線」為主要賣點，將《Pokemon》概念加入 MMORPG 元素，變成一種新嘅體驗。雖然《Pokemon》都有連線對戰元素，但整體遊戲框架以單機為主，就算係《Pokémon: Let’s Go, Pikachu!》都唔例外。踏入《Temtem》嘅世界，玩家離開新手村後，已經會見到大量玩家走黎走去，可以直接同佢地交易、對戰、組隊冒險、自訂家中佈置等等，而呢類元素正正就係玩家所渴求的。

遊戲早期被批評與《Pokemon》極之相似，甚至有人話係「抄襲」，但 Steam 版推出搶先體驗後，獲得極多正評，加上銷售數字驚人，根據 Steam Spy 資料顯示，遊戲推出一個月時已經有接近 100 萬銷量，成功洗去質疑嘅聲音。去到 2019 年更與發行商 Humble Bundle 合作，團隊則專心開發遊戲。相信係因為「全心全意」令玩家感受到熱誠，令遊戲取得成功。

《Temtem》1.0 版將於 9 月 6 日正式推出，對應平台為 Xbox Sereis X|S、PS5、Nintendo Switch 及 PC Steam。