由加拿大獨立團隊 IronOak Games 開發嘅新作《For the King II》，用類似 Board Game 嘅玩法加入 Roguelike 元素，每次玩都有唔同發展，加上可以四人連線合作，趣味十足。如果你都係鍾意玩 Board Game 就要留意啦。

《For the King II》故事講述，上集號召冒險者挺身而出阻止厄運嘅女王，突然性情大變為殘暴君王，凡係逆佢意者一律處死。曾為國家挺身而出嘅冒險者，不惜背上叛國者之名，聯同反抗勢力前往結束女王嘅高壓統治，或者戰死。

遊戲繼承前作玩法，玩家可以單獨或與最多其他三位玩家合作，喺會發生多種隨機事件嘅地圖上冒險，以類近 Board Game 嘅形式進行。每當玩家進行攻擊或施法等動作，都要先擲骰去決定接落黎嘅動作成功與否，越強大嘅攻擊擲骰次數就越多，如果每次都係正面結果就會發揮 100% 威力，反之就會削弱威力甚至會打 Miss。

要避面上述情況就要靠職業間配合，例如加入「吟遊詩人」就可以喺觸發判定時，有一定機率彈奏曲目令結果變成正面，確保強力攻擊有 100% 輸出。另外，有負責坦嘅「鐵匠」、精通感知陷阱及各類物理輸出嘅「獵人」、負責打魔法 DPS 嘅「學者」等等，推進遊戲進度就會解鎖更多職業，令隊伍組成更多變化更好玩。

《For the King II》預計於 2023 年推出，對應平台為 PC Steam，支援繁體中文。