日式澡堂對香港人黎講可能有啲陌生，大多數人對澡堂嘅認識都係來自宮崎駿作品《千與千尋》。新作《Spirittea》就可以體驗千尋喺澡堂打工嘅經歷，同樣係有神靈光顧，喜愛玩經營模擬類嘅朋友要留意啦。

《Spirittea》由獨立團隊 Cheesemaster Games 開發，係一款經營模擬遊戲。故事講述某個農村小鎮上有一間好舊嘅公共澡堂，當主角黎到呢個小鎮時遇到一隻貓咪神靈，佢話因為時代進步，已經無乜人再供奉神靈，甚至已漸漸忘記佢哋嘅存在，因此被遺忘嘅神靈開始惡作劇，希望重新引起人類嘅注意。貓咪神靈就覺得神靈長遠落去惡作劇唔掂，因此佢請求主角修復果間好舊嘅公共澡堂，等果班神靈有可以回去嘅地方，藉此令佢地重回正軌，同時又可以令人們重拾信仰，一舉兩得。

遊戲基本玩法都係靠經營旅館，逐步升級澡堂以及增加各種服務。玩家要做嘅工序總多，要準備潔淨嘅毛巾、斬木頭燒柴將水加熱到合適溫度、加入各種藥幫助入浴等等，事後仲要為每位客人準備合適嘅菜餚（有幾款煮食 Mini Game），真係忙到嘔。除咗澡堂嘅工作，可於小鎮中接取村民支線任務，或到商店購買新嘅傢俱，又或者去河邊釣魚準備食材都得，感受小鎮漫活嘅休閒生活。

《Spirittea》預計於 2022 年發售，對應平台為 PC Steam。