今個月有一大堆作品推出，當中有一隻並唔係太顯眼，但係玩落又幾過癮，講緊嘅就係《Deadcraft》（創屍紀）。以末世生存擁有強大戰大力半人半屍主角做幌子，實際上係處處滲透「Cult 味」嘅作品，加上玩法多元法，玩上手之後會不知不覺沉迷落去。

《Deadcraft》由 Marvelous 開發，係一款生存動作遊戲。故事設定主角係人類同喪屍嘅混血體，同時保留人類嘅智慧以及喪屍嘅力量，但係會因為食物或飲用水而改變人類 / 喪屍基因比率，偏向任何一方能力都會有所差異，例如越近人類會減低 HP 上限，太接近喪屍就會無法正常行走兼無法與人類溝通，整隻遊戲亦都係圍繞呢個設定去衍生各種玩法。

遊戲有四大重要數值，分別係生命、能量、飽食度、饑餓度。生命扣到零就會死，相信唔需要多講；能量就係進行所有動作都會扣減嘅數值（移動除外），歸零後會變為扣除生命值，所以喺呢隻遊戲入面唔可以亂攻擊，因為每下動作都會扣能量。至於飽食度、饑餓度兩大數值，會隨時間減少，當任一數值歸零都會導致行動不便，要回復只能靠食物同飲野，而呢兩個數值係影響瞓覺後回復嘅生命及能量多寡，簡單講就係瞓覺前食飽飲夠水，瞓醒就會滿血。

進行所有動作都會扣減能量（綠色果行），意味住唔可以亂劈亂碌

瞓覺可以回返 HP 同能量，但回復量係取決於飽食同饑渴度，越飽就回得越多

就咁睇同其他生存遊戲類似，但係飽食度同饑渴度係跌得勁快的，所以前期基本上都係忙住尋找食物及飲用資源，唔補滿呢兩個數值就等於生命及能量值補唔滿，直接影響可進行活動嘅範圍、時間及攻擊次數，極需要小心規劃每日嘅行動。當玩家可以點到增加搜集資源及減少消耗嘅技能後，就會慢慢擴大自己活動範圍及可做嘅事情，感覺極有以前《Lost in Blue》果種求生感。

飽食度同饑渴度係跌得勁快，前期係幾難玩下

學到增加收集量及減慢消耗等生存必需技能後，可進行活動嘅範圍、時間就會增加

遊戲暗藏各種有趣彩蛋，例如呢招技能名稱

當有餘裕做搜集資源以外嘅事情後，就要慢慢建造自己基地各個設施，例如可淨化污水嘅濾水器、煮食用營火、耕作農田等等，確保補給；另一方面要準備廢鐵、布等等去製造武器。武裝好自己後，其實遊戲先正式開始。

上面有講過，主角係同時保留人類嘅智慧以及喪屍嘅力量，喺城鎮時要以人類嘅姿態幫居民解決問題，或者用暴力手段恐嚇居民或暴徒搶奪必要物資。面對喪屍時，喪屍力量就令主角可做出各種強力必殺技殺敵，但係每次使用喪屍之力就會消耗「喪屍力」令自己更接近人類。透過進食腐肉、飲喪屍血就可以增加返「喪屍力」令自己接近返喪屍果邊，但係呢類食物通常都會要扣血食用。即係要好打就要扣住血咁啪爛肉屍血，或者飲淨水燒肉保持高血量去挑戰喪屍，兩種玩法各異。

進食人類食物就會接近人類、食喪屍料理就會接近喪屍，要不時用食物去調節「喪屍力」，例如打王時就最好接近喪屍果邊，戰鬥時就可以出多幾次強力技能。

喺城入面恐嚇或者殺人會被通輯，非常咁《GTA》

喺本作入面，除咗主角可以啪屍血，就連農作物都可以。一般耕作可使用污水，亦可使用屍血，當然種出嘅農作物同加嘅數值亦都唔同，玩家可自由選擇玩咩路線。另外，除咗種農作物，仲可以「種屍」。顧名思義，種屍即係將屍體加工成種子，澆屍血幾日後就會種出服從主角命力嘅「自家喪屍」，呢類喪屍可以當佢做勞動力，或者帶佢哋上戰場都得。由於佢哋會使用該身體生前所使用嘅武器，所以用咩屍體做素材都好講究，例如打王就最好整幾隻用盾嘅做坦，加多幾隻用槍嘅做輸出，當然你亦可以選擇完全唔帶喪屍出街，一騎當千。

本作最好玩元素之一，不停「種」喪屍大軍，好過癮

種出黎嘅喪屍裝備返生前所用武器，所以揀咩屍體做素材都有講究

總結：

《Deadcraft》玩法真係非常豐富，但係開荒期真係要用「痛苦」形容，打幾隻喪屍就無晒力、行一陣就渴，最慘係得污水可以飲用，數量亦都稀少，但當捱過呢段時間後就會慢慢感受到遊戲嘅魅力，特別係求生呢 Part 真係有 Feel，你要時刻睇實飽食度同饑餓度，唔似其他求生遊戲十年都唔餓。

作品創意十足，但喺仍有唔少部份不足。例如翻滾動作只會跟角色面向碌，無法自行選擇方向，亦都無法穿過敵人，被圍時完全無用；部份任務完成後唔會計算你背包剩餘空間，完任後會「食」你道具、不能同時接取多個任務、地圖畫面非常 Lag 等等，都係可以靠更新解決嘅問題，希望製作團隊正視並快速修改，令遊戲更盡善盡美。

《Deadcraft》（創屍紀）已經推出，對應平台為 Xbox Series X|S、Xbox One、PS5、PS4、Nintendo Switch 及 PC Steam，支援繁體中文。