有見微軟推出嘅 Xbox Game Pass 大受歡迎，Sony 亦都緊接推出自家嘅訂閱服務，亦即係今日正式上線嘅全新「PlayStation Plus 訂閱服務」。本來係值得高興嘅事，但因為新服務嘅收費非常有「特色」，引起港台網友嘅爭議。

全新訂閱制度分為基本、升級、高級三個 LV，每個 LV 都會有相應嘅內容，聽落去就同 Xbox Game Pass 差唔多，不過好快就有玩家發現問題。玩家要升級至新嘅訂閱制度就要比錢升級，但就要先「補差價」先升級到。即係話假如曾經喺特價優惠時買 PS Plus 會籍，當要升級到新訂閱制時就會計返正價差額，又由於舊會員玩新制無得揀訂閱期，亦即係 PS Plus 會籍儲得越長，就要比得越多錢，變相係比個機會舊玩家去證明自己忠誠度，同時令「Full Price is Art」呢句說話講出口時更鏗鏘有力。

全新「PlayStation Plus 訂閱服務」

中國地區玩家喺 Twitter PO 出自己升級服務所需金額 （該玩家係知名論壇 NGA 版主）

除咗 Upgrade 要補差額之外，升級同高級兩個 LV 嘅差別只係高級有遊戲試玩同經典遊戲目錄，但係首波經典遊戲被爆出只有 16 款，大都並非吸引嘅遊戲，呼聲最高嘅《無雙》、《機戰》等等一律欠奉。但係綜合討論區、Twitter、PS Facebook 等平台，普遍玩家都係讚譽有加。大多數支持者潛台詞都係覺得今次嘅政策雖然明顯係為咗吸納新玩家，但同時令一眾舊玩家用頂級消費去購買會籍，果種優越感係其他平台所不能比擬（請參考下面截圖）。

Lihkg 截圖

PlayStation 官方 Facebook 截圖

PlayStation 官方 Twitter 截圖

新嘅 PlayStation Plus 訂閱服務只係啱啱推出，雖然係數量及價格上對比 Xbox Game Pass 仍有一段距離，但係佢嘅吸引力在於自家 3A 大作以及優越感，建議大家可以先行比較兩個平台方案，選擇一個啱自己嘅玩法。