靈修、禪修、冥想等課程喺世界各地都經常被利用為騙案材料，估唔到外國有製作團隊都有類似題材嘅新作。日前公佈嘅恐怖作品《THE CHANT》，主角參加靈修課程中伏、誤上小島嘅故事，感覺仲同電影《仲夏魘》（Midsommar）幾相似，令人不寒而慄。

《THE CHANT》由加拿大遊戲團隊 Brass Token Studio 開發，係一款恐怖動作冒險遊戲，採用第三身視點。故事講述，主角為咗擺脫自己嘅過去，參加咗一個喺某座小島名為「Prismic Science」嘅靈修課程。去到本應以為係平靜嘅小島後，先發現呢度到處都有邪教嘅味道，而且仲進行緊邪教儀式並意外打開神秘惡夢空間，玩家就要喺咁嘅情況下想辦法逃離此地。

惡夢空間會以跨維度生物姿態現身，不但會令人精神陷入瘋狂，更會獵食恐懼、焦慮等負能量，要逃離此地必須擁有強大嘅精神承受力，所以玩家要透過不同方法去增強精神力量。由於本作以邪教為主題，製作團隊集結咗各種邪教、惡魔獻祭等元素，比大家體驗一下平時不易接觸到嘅惡意。

《The Chant》預計於 2022 年秋季推出，對應平台為 Xbox Series X|S、PS5 及 PC，之後會有更多如遊戲玩法等情報公開，有興趣嘅玩家可先 Follow 佢哋嘅 Twitter。