玩捉內鬼嘅狼人殺遊戲鬥智鬥力，之前推出嘅《Project Winter》同《Among Us》都係呢類型，黎緊又有一款新嘅同類型作品《Sinister Night》，今次玩靚畫面加恐怖 Feel，成班朋友一齊玩應該好好 Feel，今個星期推出。

《Sinister Night》由獨立遊戲團隊 zstar 開發，係一款多人生存恐怖冒險推理遊戲，採用第一身視點，支援最多八人線上同遊。遊戲受到 80 年代經典恐怖電影《The Thing》啟發，透過人與人之間嘅猜忌、懷疑營造恐怖嘅氣氛。背景舞台設定於一間廢棄教會學校，八位直播主因為參加咗真人 Show 節目而齊集於此，但其實喺呢八人入面有兩人已被惡靈附身並開始殺戮行動，到底其他人有無辦法搵出果兩個人？

主要玩法同述兩款遊戲類似，玩家要喺八位參加者之中，透過物品、任務、位置訊息、通信、行為中嘅蛛絲螞跡，去識別偽裝為普通參加者嘅惡靈並驅逐佢哋。但係當眾人都各懷鬼胎嘅情況下，要搵出偽裝者並不容易。因此，喺本作入面除咗識別惡靈，仲可以尋找獻祭用嘅道具，阻止惡靈完成最後儀式，同樣可以獲勝。另外，玩家會得到各種有輔助道具對抗惡靈，例如有暫時驅邪能力嘅十字架、加快逃跑速嘅腎上腺素、夜視鏡等等。

《Sinister Night》預計於 5 月 19 日發售，對應平台為 PC Steam，支援繁體中文。