最近兩年 Keep 住有非大廠出品，玩西部風格同時質素極佳嘅遊戲，例如之前我哋介紹過嘅即時戰術遊戲 《Desperado 3》、動作角色扮演遊戲《Weird West 詭野西部》。今次介紹嘅新作《Hard West 2》同樣係玩西部，不過就玩回合制戰術策略，同樣有趣。

《Hard West 2》由獨立遊戲團隊 Ice Cold Games 開發，係一款回合制戰術策略角色扮演遊戲。玩家將扮演悍匪 Gin Carter，帶領一班擁有特殊能力嘅同伴，諗住打劫傳說中嘅幽靈列車，當佢哋上車之後先發現架火車原來真係由惡魔所控制。與惡魔對決後，主角們落敗並被奪走靈魂，逃離後決定重組隊伍並踏上奪回自己嘅靈魂旅途。

遊戲主要玩法類似《XCOM》、《Gears Tactics》，每位角色會有三個行動點數，移動、攻擊、施展技能、道具等都會消耗相應點數，當所有角色耗盡點數後到敵方回合。為咗增加策略性，製作團隊加入「Bravado」機制，只要達成「擊殺」就會回復所有行動點數，運用得好的話理論上係可以無限行動，而且試玩時無意中發現「擊殺」隊友亦會發動「Bravado」，亦即係必要時可以靠殺隊友延續行動，策略性大增（特別係只要喺自己回合就可以任意切換角色）。

除咗「Bravado」機制，每位角色都有獨特技能，例如主角識「穿牆射擊」、女巫可以同視線內任一敵人互換位置。遊戲中每次攻擊都會因應敵方位置、有否低頭進入掩體去計算命中率，對掩體後嘅敵人可留意附近有無金屬物件，有的話就可以用「跳彈」反射子彈攻擊敵人，不過要注意敵人同樣識玩「跳彈」，所以回合完結前要注意角色走位。

一般回合制遊戲都會令人有種「節奏慢」嘅感覺，喺《Hard West 2》中則加入動態關卡設計，以第一關為例，主角們騎馬接近高速移動中嘅火車，上車後火車仍然會繼續高速移動，中途更會有增援敵人高速接近。由於場景持續變化，就算係回合制都唔會因為畫面靜態而覺得「好慢」。另外，戰鬥以外亦會有普通 RPG 般探索部份，有機會得到各種武器、道具，亦會推進劇情。

探索或戰鬥中有機會得到「卡牌」，安裝唔同嘅卡牌會增加速度、命中率等被動能力，集齊特定牌型後更會解鎖特殊能力，而卡牌係每位角色分開計算的，亦即係每位玩家都可以有唔同玩法，即使係用緊同一角色，幾有趣。

《Hard West 2》預計於 2022 年 8 月 5 日推出，對應平台為 PC Steam，目前商店頁面有免費試玩版下載，內容係第一關單人戰役，主要係比玩家了解遊戲玩法，支援殘中。