大家生活忙碌，就連打機時間都唔多，所以短時間對戰遊戲頗受歡迎（例如《Brawl Star》）。今次介紹嘅遊戲《Bail or Jail》係一款快速非對稱對戰遊戲，兩年多前曾經喺 Nintendo Switch 上推出，近日宣佈移植至 PC Steam，即日起仲有 Demo 試玩，鍾意玩呢類遊戲嘅朋友可以一試。

《Bail or Jail》由 Free Style 開發，係一款非對稱生存對戰遊戲，最大支援四人同時連線遊玩，採用第三身視點。玩家將分為人類及妖怪兩隊，人類一方由三人組成，目標係逃離妖怪嘅追捕；妖怪一方則獨力作戰，目標係時限內捕捉所有人類，每場時間三分鐘，雙方都只有極短時間達成目標。

同一般非對稱「玩捉」遊戲一樣，人類一方喺對戰時主力都係躲藏及奔跑走位，危急時更可以用次數有限嘅手提燈閃魂妖怪。妖怪就可以穿越牆壁、追蹤腳印，而且仲會有各種特殊能力，例如青蛙就可以跳上樹玩暗算。當妖怪捉到人類後就可以放佢入場中間嘅監獄，完場前捉晒所有人就贏，但人類一方亦可以趁機去救出被困嘅同伴。

《Bail or Jail》正上市日期未定，但係會喺 5 月 12 日推出免費試玩，有興趣嘅朋友可到 Steam 頁面領取，支援繁體中文。