講到宜家家俬大家應該會諗起肉丸熱狗雪糕，但係相信你同我都一樣，幻想過喺佔地極廣嘅舖內玩捉、War Game 之類，咁多 Cover 一定好爽。新作《Retail Royale》將呢個幻想變做遊戲，多位玩家喺宜家家俬入面使用各種騎呢武器廝殺，又幾過癮！

《Retail Royale》由 DarxDev 獨立開發，係一款多人連線對戰動作遊戲，採用第一身視點，最大支援 16 人線上遊玩。遊戲基本玩法即係大逃殺，不過場地變咗做宜家家俬舖內，為咗避開版權問題所以喺遊戲入面將「IKEA」改為「IDEA」，但係各種家俬、店舖風格等等都有還原，至於玩家就扮演舖頭入面嘅假人拎起各種武器廝殺。

武器方面有斧頭、刀仔、泥耙、平底鑊等各類近戰武器，亦有弓箭、釘槍甚至係瑞典肉丸發射器（可惜無跟紅莓醬）等遠程武器，又或者隨手執起店中物件掉人，就算係梳化呢類大型家具都可以用黎攻擊。除咗現成武器，你亦可以回收用唔著嘅野，並使用呢啲材料製作其他物品，玩法自由。

《Retail Royale》現時已經推出，對應平台為 PC Steam，免費遊玩。作者表明雖然遊戲係免費，但係會持續更新，未來會加入更多武器、模式及語音溝通系統，良心之作！