土耳其獨立工作室 Biotech Gameworks 推出一隻充滿國家風味嘅模擬遊戲《Kebab Simulator（土耳其烤肉模擬器）》，對應 Steam 平台，正式發售日未定，預定 2022 年內開始早期體驗。遊戲作為小本製作的獨立遊戲，美術設計比較粗略，不過遊戲自由度極高，而且有大量可惡搞空間，鍾意玩模擬類小品遊戲嘅玩家可以多加留意。

玩家飾演繼承屋企烤肉店嘅店主，由舖頭裝修、買材料、研究食譜、烹調、去到上菜應對客人，全部都要一腳踢，係一隻玩法非常豐富嘅經營遊戲，絕對攰過你返工。

由於你係老細，你要做到客人至上，抑或你要「澳牛」式待客，一切都係你話事！你可以虛心接受客人意見，亦都可以一言不合就將烤肉掟落客人塊面度趕佢走。

遊戲目標係將烤肉店經營為小鎮上面最出色嘅食店，由於工作室為土耳其出身，所以對於設計呢個以「家鄉菜」為主題嘅遊戲時絕對係落足心機，非常注重細節，務求玩家可以感受到最本土嘅土耳其風味。

《Kebab Simulator》對應 Steam 平台，正式發售日未定，預定 2022 年內開始早期體驗，有新消息再為大家報導。