以太空科幻、寫實、古代為背景嘅城市模擬我都玩過，但係深入海底起城市我就真係未玩過。新作《Aquatico》帶大家深入海底，建設水下都市拯救人類，加上各種近未來科幻設施，呢種設定為遊戲帶來新鮮感，喜愛此類型遊戲玩家值得留意。

《Aquatico》由 Digital Reef Games 開發，係一款城市模擬建設遊戲。背景設定於近未來地球，地表已成廢墟人類無法於此地生存，但係有一群人仍然心存希望，踏上旅途尋找新嘅安全地帶，最後終於搵到一個適合佢哋展開新生活嘅地方「海底」，喺呢個充滿挑戰嘅超現實世界中，努力尋找資源建立水中都市拯救倖存人類。

遊戲基本玩法同其他城市模擬建設遊戲差唔多，都係要採集各種資源，建立各種設施確保生產線，同時為照顧居民生活所需、擴大居民數增加勞動力等等，當然仲要開發新技術新技能，玩慣呢類遊戲嘅玩家應該好快上手。由於城市設置於海底，採集所得嘅資源以及生產設施同其他遊戲一定有所不同，雖然現時未知有咩建築物單位，但照基本邏輯推斷核電應該係主要能源供應設施，話晒有天然水冷系統嘛。

另外已知玩家可使用無人機、潛艇、機械化水下機器人等各種針對特殊環境嘅科技及技術，並且鼓勵玩家盡量向外探索擴展領地，成功的話會獲得多重獎勵。現時已知會提供故事模式，會有各種與故事劇情相關嘅任務玩。

《Aquatico》預計於 2022 年秋季推出，對應平台為 PC Steam。