又到咗為大家介紹獨立遊戲嘅時間啦，今次要講嘅作品係韓國出品嘅《Little Witch in the Woods》，玩法係大路嘅角色扮演，但製作團隊用心在角色與其他人物之間嘅互動及設定，對話有趣搞笑用心設計，絕對係治癒系佳品。

《Little Witch in the Woods》由韓國獨立團隊 Sunny Side Up 開發，係一款角色扮演遊戲。故事講述魔女學校見習生 Ellie 為咗修行，打算去世界各地嘅魔女之館，不過乘搭嘅火車出咗事故，所以佢就去軻附近嘅森林探險並發現一間已被廢棄嘅魔女之館。原本打算喺度休息完就返火車，點知瞓過頭，於事佢就決定係森林修行，之後再作打算。

基本上玩家要做嘅就係探索、收集材料，並製作出各種，呢個亦係成為魔女嘅條件之一。喺收集材料嘅過程中，玩家會發現各種特別道具、解鎖新區域，逐步擴大可探索範圍，亦會遇見各種人物、動物，可以同佢哋互動，或者幫佢居民做任務等等。不過最正嘅都係收集材料呢部份，材料可以係捉兔仔拔晒佢啲毛、原隻青蛙搾汁、摸肚會嘔泡泡嘅蜥蜴、有腳識得走嘅植物等等，同萌萌系畫風形成強烈對比。

動物以外仲有人類嘅 NPC，設定上亦都非常有趣。例如有一位中咗詛咒嘅旅人，講親野都係讚美大自然有幾美好，但係當你整解咒藥比佢服用後，就會露出真面目係咁鬧大自然，非常過癮。美中不足嘅地方係早前試玩版中文翻譯做得麻麻地，轉返做英文表達嘅意思仲比較精準，可惜。

《Little Witch in the Woods》預計於 5 月 17 日進行搶先體驗，對應平台為 PC Steam，正式版則預計於 2023 年推出。