今年三、四月都有好多大作推出，搵到悶悶地不妨又試下啲小品遊戲。新作《Invercity》用簡單像素風格，配合以「重力」為主題，不停改變重力嘅方向去解開唔同嘅謎題，簡單得黎幾有趣，輕鬆玩下應該幾唔錯。

《Invercity》由 Marudice 獨立開發，係一款平面解謎遊戲。故事講述有一日地上嘅物件發生「倒立現像」，即係所有物件都跌入天空中，為咗調查事件嘅起因，身為記者嘅主角就前往城中報導兼查明真相，喺難以前進嘅城中以「倒立」技能四處尋找線索解開謎題。

遊戲主要以「倒立」以及「倒轉播放」兩種能力遊玩。由於遊戲背景設定咗城市處於重力倒轉嘅狀態，路上嘅物件飛晒上天，令到道路無法正常行走，所以當重力反轉時，倒立行走就變成用手捉住天花懸掛，即使物件飛上天自己仍然會處於「地上」。

至於「倒轉播放」能力，喺路上會遇到好多地方出現「倒轉播放」按鈕，觸碰後直播室入面嘅主播就會將螢幕反轉，同時地圖亦會上下顛倒，喺適當時使用倒立即可喺天花板移動，前進到目的地後放手即變返正常行路。當然，除咗上述使用方法，喺其他地方亦要使用「倒轉播放」更改重力方向，去為自己清出一條道路，要不停交互使用兩種能力去解開謎題。

《Invercity》預計於今年秋季推出，對應平台為 PC Steam。