有返咁上下機齡嘅朋友相信都玩過或者聽過《Front Mission》嘅大名，一眾 Fans 們等待多年嘅新作終於有聲氣，可惜對應平台竟然係「手機」，立即令人聯想到滿滿嘅課金元素。想買勁手勁腳？課金啦！想買勁槍勁砲？課金啦！Yeah！

《Front Mission: 2089 Borderscape》手機版由 Square Enix 監修、BlackJack Studio 開發（即係做《夢幻模擬戰》手機版果間），係一代經典機甲策略角色扮演遊戲《Front Mission》正版授權作品。遊戲背景設定於 2089 年，時間線係初代《Front Mission》、第二次赫夫曼戰爭之前，故事將圍繞幾位改造人主角，與 OCU、USN 等各大勢力鬥爭中逐步揭開戰爭真相。

喺宣傳影片中嘅 CG，機甲、內部構造、外甲金屬質感都頗有原作神髓，但係作為玩家最關心嘅都係遊戲系統有幾還原，特別係手機版本課金元素嘅平衡，但以上資訊都未有詳細訊息，希望唔會走樣啦。

《Front Mission: 2089 Borderscape》將會提供繁體中文、簡體中文、英文、韓文四種語言，繁體中文版由遊戲種子娛樂有限公司進行台港澳發行，推出日期未定，有興趣嘅朋友可到官方網站留意更進一步消息。