講到未來科幻背景嘅 RTS（即時戰略）遊戲，應該絕大多數人都會諗起《Starcraft》，但係新作就似乎連計劃都未有，咁就不如試下其他同類型遊戲啦。新作《Crossfire：Legion》同樣都係玩未來科幻背景，不過就近返啲現代，並且著重單位控制與戰術運用，想試新野嘅不妨留意一下。

《Crossfire：Legion》由 Blackbird Interactive 開發，係一款即時戰略遊戲。故事背景講述全球各國為咗權力，紛紛發起戰爭，令世界陷入永無止盡嘅軍事衝突之中。然後有一日，財力雄厚嘅企業集團出現，並以強大嘅軍事力量橫掃一切。玩家將率領由自己創立嘅部隊，挑戰企業集團並稱霸世界。

同大部份嘅 RTS 遊戲一樣，都係要收集資源再興建各種建築，然後再生產不同類型嘅戰鬥單位，同時確保自家基地嘅防禦。基本單位分為士兵、地上及空中載具，亦有遠程砲塔類，都係要混合兵種使用，所以會比較著重於單位控制及操作，亦要細心擬定戰術有計劃地使用資源、生產線及補給速度等等。另外，所有軍隊都會由一位指揮官統領，並會有自己嘅特殊能力，適當地使用會喺關鍵時刻發揮作用。

遊戲將提供基本嘅戰役模式以及兩種多人模式，可選擇以 3 vs 3 或 1 vs 1，亦可選擇與好友一齊玩戰役打電腦。另外更會有賽季晉級系統，有實力嘅玩家可以挑戰自己上唔上到榜。未來更會持續更新包括更多地圖及單位，以及線上社區功能等等。

《Crossfire：Legion》預計 5 月 24 日進行搶先體驗，並於今年第四季推出正式版，對應平台為 PC Steam，支援繁體中文。