歷史話比我哋聽，遊戲動畫真人化通常個結局通常都係食屎的，不過可能食得屎多，近年真人化電影越做越好，特別係《超音鼠》真人電影評價就甚高。喺 2021 年得到玩家超級好評，獲獎無數嘅遊戲《雙人成行》（It Takes Two）將會改編成真人版電影，更會由知名影星「The Rock」（巨石強森）創立嘅公司擔任監製。

《雙人成行》（It Takes Two）故事講述一對夫妻因為生活上嘅種種，關係瀕臨破裂並準備離婚，但係佢哋嘅女兒不忍雙親離異，流下嘅眼淚令到魔法展現，將雙親梅同科迪意識轉移到兩隻公仔上，如果想拎返自己人類嘅身軀就必須與對方一同冒險，衝破所有難關。亦因為咁，所以本作係要兩位玩家合作遊玩。由於劇情、玩法等非常出色，喺玩家與媒體之間獲得極高評價，並橫掃包括 The Game Awards 年度最佳遊戲大獎在內等多個獎項。

根據外媒 Variety 報導，《雙人成行》已經開始緊真人電影化工作，並且已列入 Amazon 優先發展項目。負責將電影化監製嘅公司有 dj2 Entertainment 及 Seven Bucks Productions，前者係製作《超音鼠》、Netflix《Tomb Raider》嘅電影公司，後者則由「The Rock」創立，最近嘅《紅色通緝令》（Red Notice）、《叢林奇航》（Jungle Cruise）就係佢哋嘅作品。編劇則由《超音鼠》、《超音鼠 2》編劇 Pat Casey 及  Josh Miller  負責，另外亦有傳 The Rock 會親自上陣出演電影，不過消息未獲證實，估計如果有佢做的話應該唔會做科迪，做本書反而幾適合佢。

目前《雙人成行》真人電影版仍然係處於早期計畫階段，雖然編劇及監製團隊接近齊人，但係仲有大量崗位未決定，例如大家最關心嘅演員，所以正式上畫時間仲要等下，不過呢個班底應該就唔伏嘅（如果係 XX危機真人版班底就真係要擔心啦），值得期待下。