回合制遊戲同動作遊戲大家都應該玩唔少，如果將兩樣野溝埋變成「回合制動作遊戲」又會係點呢？新作《RESEARCH and DESTROY》就融合咗兩類遊戲嘅特性，既有回合制遊戲嘅策略性又有動作遊戲嘅趣味，都幾得意。

《RESEARCH and DESTROY》由 Implausible Industries 開發，係一款回合制動作遊戲，支援多人線上或線下遊玩，採用第三身視點。玩家將扮演三位科學家，一邊研究及開發新型武器及裝備，一邊使用呢啲新武器殲滅佔領地球嘅各種超自然生物。

雖然係分類係動作遊戲，但係本作更著重於擬定策略以及角色站企位、走位。喺每個回合都會分玩家回合同敵人回合，玩家回合時每個角色都會有 8 秒行動時間，呢段時間內敵人唔會有任何動作。玩嘅嘅時間只會喺角色移動或進行攻擊時消耗，只要仲有時間就可以喺同一回合中隨意行動，直到時間倒數至 0，就會切換至敵人嘅回合。換言之，主要嘅玩法就係點樣係時限內進行最大量嘅攻擊，同時考慮回合結束時角色位置，預留時間走位，真正考策略考技術。

玩家可操作三位科學家，當中又分為兩類。兩位著白袍嘅角色特性係可快速移動，通過存放武器減低負重將可以進一步提升速度；又或者可犧牲速度換來裝備重型武器。另一位穿著保護衣嘅角色雖然速度唔高，但係擁有高體力以及高度嘅耐火性，就算行走於火上都唔會受到傷害。

上面講嘅係「DESTROY」嘅部份，玩家可建造學院進行研究並開發新型武器及裝備，出戰前亦可先行調查即將前往嘅地區，選擇專剋該類型魔物嘅裝備。整題流程就係透過戰鬥，使用各種新式武器及策略，逐步將世界由超自然生物嘅支配中解放。

《RESEARCH and DESTROY》將於4 月 26 日發售，對應平台為 Xbox Series X|S、Xbox One、PS5、PS4、Nintendo Switch 及 PC Steam & Microsfot Store，支援繁體中文。