好多時好玩嘅遊戲因為缺乏宣傳，導致少人玩兼無乜人討論，今次介紹嘅遊戲《Unsouled》（失魂者）喺舊年十一月已經推出搶先體驗，雖然爽快得黎又有難度，但係就無乜人知。如果你之前都 Miss 咗呢隻遊戲的話，今個月尾將推出正式版同時出埋家用機版本，絕對值得放落今個月嘅購買 List。

《Unsouled》由 Megusta Game 開發，係一款平面動作角色扮演遊戲，採用俯瞰視點。玩家將扮演一位擁有吸收靈魂能力但被流放嘅王子，喺死者橫行嘅世界中探索冒險尋找真相嘅故事。遊戲主打快速戰鬥，享受充滿緊張刺激又有快感嘅戰鬥。

作為遊戲賣點嘅戰鬥系統，有一套特別嘅設計。主角雖然擁有豐富嘅劍技招式，但係每招都有不同嘅冷卻時間，無得用死一招，但係每招都會有「連鎖時機」，當角色施展劍技並發出黃色光時，立即輸入其他劍技招式，即可發動連擊系統，並減少技能發動後嘅硬直。簡單講就係出 A 技接 B 技接 C 技咁不停駁招，只要接招時間掌握得好就可以一直連落去，特別係打 Boss 時爽度爆燈。

除咗連技系統，仲有高風險高回報嘅「破招系統」，只要睇準機會就可發動，可以瞬間逆轉戰況。至於收集升級元素喺本作都有，透過收集靈魂將可解鎖獲得各種技能，包括遠程技能、被動技等等。另外，玩家可以利用周圍嘅環境，可以推人撞牆造成更大傷害、砍樹壓倒敵人、推敵人跌落懸崖等等，玩法多元化。

即將推出嘅《Unsouled》正式版將收錄五大章節、六十種被動技能、十六種角色技能及七種 Boss 技能，並會追加訓練模式及挑戰模式。預計於 4 月 28 日推出，對應平台為 Xbox Series X|S、Xbox One、Nintendo Switch 及 PC Steam，並會同日登錄 Xbox Game Pass。