香港經典驚慄電影《八仙飯店人肉叉燒包》入面嘅情節係講將人肉做成叉燒包，再賣比顧客食，估唔到新作《Godlike Burger》（宇宙漢堡王）都有類似嘅概念，不過就變為殺外星人整包再賣返比外星人食，仲要小心唔好比人發現，唔係警察上門就 GG。

《Godlike Burger》由 Liquid Pug 開發，係一款管理模擬遊戲。玩家將扮演餐廳老闆兼大廚，日頭就經營太空餐廳提供美味嘅漢堡，同時借機暗算客人將佢哋變成絞肉。到咗夜晚就要烹調「秘製醬汁」、升級廚房、佈置陷阱等等，總之目標就係成為銀河系最著名嘅餐廳。

遊戲基本上分為日頭同夜晚兩部份，日頭就好似《Overcooked》咁，要跟次序烹調食品，然後送餐賺錢，但為咗補充肉類庫存，所以要做啲手腳，例如喺包入面落瀉藥，引佢入早已設置陷阱廁所，殺佢再將條屍變成美食，透過不段重複呢個步驟解鎖新嘅星球、廚具、陷阱等等。必需要注意嘅係，每次犯案都要確保無目擊證人，否則會引來警方嘅懷疑。有趣嘅係萬一被人發現，都可以用賄賂或者潛逃去其他星球等手段繼續經營，只要無入監倉就有方法走甩。

至於夜晚嘅部份，就主要係升級廚房廚具、針對不同嘅外星種族研發新菜式、烹調「秘製醬汁」（即係加入肚瀉等特殊效果）、佈置陷阱等等，為第二日開舖做好準備。除咗一般營運，仲會有各種任務需要玩家完成，簡單如屎坑塞去到喪屍來襲等包羅萬有，已知有數十種難題迎接玩家。

《Godlike Burger》預計於 4 月 22 日推出，對應平台為 PC Steam、Epic Games Store 及 GOG，支援繁體中文。