大逃殺類遊戲已經唔係好似幾年前咁每個月都有一款「換皮」新作，但咁樣反而令到新嘅作品更精更有趣，例如之前隻《Super Animal Royale》玩可愛風平面射擊就幾得意。新作《Knightfall》雖然都係大逃殺類，但係主要玩法更接近於騎馬競速，最正係類似《Mario Kart》咁有漂移有捽火，搞笑又過癮令作品短時間內已得到「極度好評」評價。

《Knightfall》由獨立工作室 Landfall 開發，係一款線上多人對戰射擊遊戲，採用第一身視點（騎馬時會變成第三身），最大支援 24 人同場對戰。玩家需與好友組成二人小隊與其他隊伍比拼，最快穿過所有小鎮到達城堡嘅隊伍取勝，途中可對其他隊伍發動攻擊，亦可下馬伏擊經過嘅隊伍以手上嘅槍械擊殺對方，玩法極之自由。

講到明鬥快，騎馬自然係指定動作。兩位玩家會共騎一匹馬，一位負責操作一位負責攻擊（開槍打人或者掉炸彈），馬匹可以用漂移技巧過彎，當使用漂移過彎時地上會出現有顏色嘅火，持續漂移火嘅顏色會轉變同時會賦予短暫加速，即係同《Mario Kart》一樣。另外，前往城堡嘅路上會穿過不同嘅城鎮，最先到達城鎮嘅隊伍可優先選擇獎勵武器及補血繃帶，因為有明顯嘅優勢所以各隊伍會互相爭奪首名到達，刺激好玩。

《Knightfall》已於 4 月 1 日上架，對應平台為 PC Steam。