早幾年出過一隻「跑步遊戲」《QWOP》，但因為雙腿動作要獨立操作，想行一步都難到嘔，被喻為「世上最難的遊戲」。預計今年推出嘅建築模擬新作《The Enjenir》，雖然本質係玩起野，但係所有事物都加入物理引擎，包括玩家所操作角色都係要獨立操作移動，類似《QWOP》咁（但當然無咁難），真係齋諗都覺得難玩。

《The Enjenir》由 Peaty Turf 開發，係一款建築模擬，採用第三身視點。背景設定於中世紀，玩家將扮演一名笨拙嘅工程師，發揮無限嘅創意去建造橋樑、房屋等建築。基本系統同其他建築模擬大同小異，但係本作所有嘅物件都會加入物理引擎，令遊戲變得極之困難。例如當橋粱起好後，就會套用物理系統，然後會立即計算條橋有無辦法承受自己重量，否則會冧。系統之後仲會計算物件喺橋上嘅承重力、支撐位嘅強度、平衡度等數據，每樣都要精準先得。當然，計算準確的話，可以盡量用得少材料慳錢，完全取決於玩家的技術。

建築部份困難，操作角色去建造亦都同樣困難，因為有物理引擎嘅並唔只係建築物，就連操作嘅角色都有。要操作角色移動並唔容易，因為每個肢體都有一個單獨按鍵鈕操作，想行直路已經好難，仲要推車仔運送材料，同時要計埋條橋受唔受到咁多力…….難到呢。

雖然隻 Game 好似好難玩咁，但熟悉網絡文化嘅可能喺個名「Enjenir」已經估到隻 Game 係搞笑居多，因為本身呢個字已經係出名嘅 Meme，經常露出毫無根據自信去做低能野，配返「Enjenir」呢個諧音（Engineer），成件事 Fit 晒！

《The Enjenir》預計於 2022 年內推出，對應平台為 PC Steam，支援繁體中文。