有留意外國電競比賽的話，相信一定聽過烏克蘭戰隊 NAVI （Natus Vincere）嘅大名，而佢嘅創辦人亞歷山大科漢諾夫斯基（Alexander Kokhanovskyy）亦係烏克蘭電競界別最具影響力嘅人，早前佢接受外媒 Dexerto 專訪，原來佢已經投身戰爭保衛國家，而且更笑稱估唔到《CS：GO》嘅戰術技巧喺實戰堅係有用。
亞歷山大佢係前《CS》選手，喺 2009 年成立 NAVI 戰隊，並喺 2010 年橫掃 IEM、ESWC、WCG 等一堆國際賽事冠軍，之後更開設電競學校培訓新一代選手，佢本人更成為烏克蘭職業電競協會（UPEA）主席，喺烏克蘭絕對係舉足輕重嘅人。雖然喺電競界非常勁，但係佢本人並無受過職業軍事訓練，所以佢提槍加入戰事係非常之勇敢嘅行為。目前佢隸屬於基輔一個 20 人快速應變小隊，主要係協助警察維持首都安全，佢喺訪問入面亦都笑住話「《CS：GO》嘅戰術技巧堅有用，佢嘅團隊喺協助佔領、團隊合作、戰術意識等技巧都可以喺現實中用到。」
當然，雖然佢話《CS：GO》技巧用得著，但主要都係講緊溝通同意識上嘅作用，並唔係叫你 Rush B、跳狙、拎把蝴蝶刀出黎轉圈等等（大家唔好 FF 太多）。除咗親身上陣外，NAVI 戰隊亦都以行動表示決心，喺 3 月 1 日已經同俄羅斯贊助公司 ESforce 斷絕關係，因為 ESforce 公開否認烏克蘭正受到非法入侵，而且更將隊中嘅俄羅斯選手 latt1k、fe2nk、xiELO 放生，呢個行動直接影響 NAVI 嘅收入，但仍無阻佢哋嘅決定。
— NAVI (@natusvincere) March 1, 2022
目前烏克蘭仍處於戰事當中，戰爭結果無人知道，目前已造成數千人死亡，數百萬難民流離失所，好多城市已被並摧毀。但係亞歷山大認為烏克蘭一定會贏百分之百的獲勝，面對四千萬人嘅國家無可能獲勝，而佢哋願意不惜一切代價保衛自己嘅國家。
不撤不退，我愛香港。