Square Enix 於 2022 年 3 月 4 日推出的《Triangle Strategy 三角戰略（下稱三角）》，綜觀而言絕對稱得上係一隻佳作。雖然推出時期與大熱動作遊戲《Elden Ring》接近，而令到《三角》一開始未算受到玩家注目；不過，呢隻由《Octopath Traveller八方旅人》團隊開發的 SRPG，對於喜愛玩戰棋遊戲嘅朋友黎講，相信係 2022 年必玩的作品之一。

遊戲以架空地區諾澤利亞大陸作為舞台，大陸上面共有三個國家，分別為位據北方極寒之地的鋼鐵之國「艾斯弗斯特公國」、擁有鹽湖的沙漠聖土「聖海桑德大教國」、以及行君主制，處於兩個國家中間的「格林堡王國」。

在故事發生之前，三個國家為了「鋼鐵」以及「鹽」的資源而發生過一場「鹽鐵大戰」，在事過境遷之後，三個國家聲稱為了「平等分配資源」而進行和平外交，即將進行「三國共同進行的開採計劃」，聲言資源大家平均分配，講求和平與平等。

「格林堡王國」當中共有三位領主，而玩家飾演的「瑟雷諾亞・沃荷德」則為沃荷德家的繼任領主，為了促成邦交，與「艾斯弗斯特公國」進行結婚聯姻。眼看世界走向和平，萬物俱榮，原本以為係平和繁榮日子的開始，不過三個國家之間以及國家內部的權利鬥爭，其實而家先至剛剛開始。

故事詳細情節當然建議玩家們自己遊玩考究，不過《三角》遊戲最大賣點，並不在於「戰棋」，而係在於「抉擇」。

《三角》採用有趣的投票系統，面對劇情裡面一啲重要分支時，都需要玩家領導團隊成員進行「投票」，以「少數服從多數」的方式，去決定下一步的行動。

遊戲嘅賣點絕對係各項路線的分支。根據玩家嘅選擇，會有新隊員入隊，但同時可能會造成隊員離隊。故事一開始，對於角色性格就有簡潔而深刻嘅描寫，同時與主角有住唔同程度嘅羈絆，因此面對住「邊個決定會導致失去邊個隊員」呢一點，進行遊戲時的確會令玩家出現心理掙扎。

令玩家出現心理掙扎嘅，仲有故事發展嘅路向。《三角》總共有四個結局，當然喺呢度就唔劇透大家，但係「要唔要與有血海深仇嘅敵人合作」、定還是「犧牲小部份人去換取大多數人嘅利益」呢？到底要「就算路途辛苦，都要死命去支持一個唔適合當王嘅人」、定還是「以天下為依歸，有能之士居之」呢？

三個國家裡面，其實我認為「主張能者優先、信奉弱肉強食主義」的「艾斯弗斯特公國」並唔能夠稱為大奸大惡之徒（當然每個政權裡面都有垃圾，無錯我講緊對姐弟），佢地只係行緊非常現實嘅資本主義模式，當然咁嘅運作會令到「富者越富、貧者越貧」。

但係，相比強行將「鹽之女神」教義、以宗教立國、唔容許國家有反對聲音嘅「聖海桑德大教國」，其實將故事套落現實角色去思考，後者嘅思想鉗制、對人民謊話連篇、將少數族裔打壓、將佢地視作低廉奴工以及進行思想改造……呢種統治方式，是否又有點似曾相識？

《三角》嘅戰鬥頗有難度，假如玩家初始一周目已經選取普通或以上難度進行遊戲，相信去到後面要不斷刷練習關卡去升 Level 先至可以過到關；不過除卻難度之外，《三角》本身嘅戰鬥模式（戰棋玩法）算係非常穩建常見嘅設計，都係講求玩家走位、能否善用地形優勢等等，唔算有非常特別之處。

至於《三角》最出色嘅地方，其實在於「選擇」。「選擇」對於投入遊戲嘅玩家黎講，相信進行大部份決定之前都會有所掙扎。作為一個遊戲玩家，當然我地可以 Save Load 重新讀檔、或者進行二周目、三周目遊戲去試下唔同發展路向。

但係，假如呢個係一個真實嘅故事，或者《三角》好似《火焰之紋章～風花雪月》咁樣，角色於戰場上戰死就無得復活，其實玩家真係可以體會到，位於時代的裂縫中嘅嗰種無力感。

《Triangle Strategy 三角戰略》係 Square Enix 近年出色嘅精品類遊戲之一（畢竟係《八方旅人》團隊負責開發！），遊戲留下唔少伏線值得研發第二集。假如你鍾意現實而殘酷的劇本，假如你喜愛遊玩 SRPG 戰棋類別遊戲，呢隻遊戲絕對係 2022 年不容錯過的作品之一，編輯部強力推薦！

《Triangle Strategy 三角戰略》已經推出，對應 Nintendo Switch，繁中對應。