石中劍嘅故事相信大家都聽過，傳說只要拔出插喺石上嘅寶劍並生於英格蘭者即可稱王。以呢個典故製作嘅小品遊戲《拔者為王》（The one who pulls out the sword will be crowned king）喺較早前推出，看似簡單但實際操作頗有難度，而且內含不少細節隱喻，喺短時間內已得到「極度好評」評價。

《拔者為王》由西班牙獨立團隊 Majorariatto 開發，係一款試驗性模擬遊戲。玩法非常簡單，就係透過 Mouse 移動，拔出插喺石中嘅長劍，登上國王之位。喺遊玩部份畫面極之簡單，操作亦只需要按緊 Mouse 左鍵、推上以及 ESC 鍵就可以（當 Mouse 推到枱邊無位時，可按 ESC 將 Mouse 移位）。雖然操作簡單，但隨拔出嘅劍身越來越多，游標喺劍身嘅範圍會越來越少（游標跌出劍身範圍的話，把劍會跌返去原位，要由頭玩過），加上聖光以及越唱越大聲嘅頌歌不停添加壓力，老實講都幾有難度。

當玩家成功拔出劍後，就會立即有士兵迎接你進行登基儀式，呢個時候可以轉視點觀察，眼利的話會發現好多奇怪嘅野，綜合各種線索後會知道製作團隊嘅隱喻，呢度就唔劇透留返比大家玩啦。遊戲提供線上及線下模式，線上模式會喺每次有玩家成功拔劍後，加長同加重把劍提高難度，亦即係會越黎越難玩；而線下模式則係固定長度及重量，純歡樂用。

《拔者為王》（The one who pulls out the sword will be crowned king）已經推出，對應平台為 PC Steam，免費遊玩。