可自組機甲、多人連線對戰、組隊賺錢買零件，綜合以上元素，由日本二人開發團隊 221Games 製作嘅新作《Punihi Loader 2》預計今年推出。前作喺兩年推出，並且大獲好評，今集喺上集嘅基楚上加入多種新元素，令玩法更靈活豐富。

機甲由神秘生物 Punihi 駕駛，舞台就為於一個叫做「新旭川」嘅地方，目標係奪取新旭川聯賽冠軍。遊戲採用第三身視點，玩法就類似慢節奏版嘅《Virtual On》，都係以不同武器與敵方對戰，打爆敵隊為勝，最大支援 3 vs 3。

遊戲最大嘅特色在於可以自組機甲，每一部機體由軀幹、左臂、右臂、腿、背部五個部分組成，各部份都可以安裝不同類型零件而改變機體特性。例如腳部可選擇常見嘅雙足行走型，速度、靈活性及操控性均等，亦有輪胎驅動型、懸浮型等零件，速度比起雙足型優勝，但係其他能力比較輸蝕，呢啲就要玩家自行取捨。手部零件亦有唔同類型，手型零件可自由選擇手持咩類型武器，亦有整隻 手臂都係槍炮嘅類型，當然仲有近戰武器。根據官方資訊現時會有過百種零件組合，總有一種啱你風格。

機甲種類現時有多達 26 種，另外更改背部裝備將賦予跳躍、恢復、瞄準輔助等效果，玩法及組隊嘅定位亦會因此改變。遊戲模式有基本嘅 1 vs 1 及 3 vs 3 對戰、生存模式以及賺錢專用嘅打工模式，透過賺錢就可以購買更多嘅零件，增加更多玩法。