又有一款新嘅打喪屍遊戲，不過今次就唔係用槍射，而係回到江戶時代日本，用相撲、劍術同忍術擊殺喪屍。即將推出嘅新作《Ed-0 Zombie Uprising》（エドゼロ ゾンビアップライジング），有得使用罕見嘅職業「力士」，一嘗攬爆喪屍嘅味道，正阿！

《Ed-0 Zombie Uprising》由日本開發商 LANCARSE 製作，係一款 Roguelike 動作遊戲，採用第三身視點。遊戲背景設定於江戶時代嘅日本，全世界都被捲入不明嘅病毒入侵，導致大量人類變成喪屍，日本亦都唔例外。玩家可以扮演挺身而出嘅力士雷電、劍豪無明或者女忍者三位角色其中一位，用各種方式斬殺喪屍解救日本。

戰鬥系統都係以近戰為主，投擲爆彈等道具為輔，亦會因應選擇角色不同而出現不同戰法。例如力士雷電有霸體衝撞能力、劍豪無明攻擊判定較大兼有搞笑技能「土下座」、女忍者就有忍術「飛鼠術」可以短暫飛行，各有好玩嘅地方。玩家亦可以喺據點中進行角色強化、買賣，透過強化將解鎖如增加跳躍次數、提升食物效果等被動技能，當然仲有得解鎖角色專用技，等你殺喪屍更多花式更爽。

另外，因為本作係 Roguelike 類型，關卡、地型以及敵人配置都會隨機生成，就連屋入面嘅佈置都分幾類，應該都幾襟玩。根據官方資訊，今次搶先體驗會先提供力士及武士兩名角色，忍者會喺之後嘅更新登場。內容就包括三個主線任務、五種支線任務、三隻頭目，遊玩時間大約有十小時以上，技能同道具就有過百種，而喺之後會持續更新，加入更多任務、敵人、技能同道具。

《Ed-0 Zombie Uprising》將於 4 月 4 日展開搶先體驗，對應平台為 PC Steam。