線上多人對戰遊戲多數都係射擊遊戲或者動作遊戲，但係黎緊嘅新作《CRIMESIGHT》就搞搞新意思，玩多人線上推理大戰，最正嘅係玩「預測未來」，即係要喺兇手出手前估到邊個係受害人，仲勁過水鏡八奇，好似係。

《CRIMESIGHT》由 Konami Digital Entertainment 開發，係一款線推理對戰策略解謎遊戲，最多支援六人線上同遊。故事背景設定於 2075 年嘅倫敦，為咗應付日益嚴重嘅罪案，開發出有預測未來犯罪嘅「Foresight AI」系統投入到實用階段，兇殺犯罪發生率更因此比以往減少了90%。然而，「Foresight AI」預測到自己將會出現無法防範嘅事件，為咗應付類事件衍生出特化 AI「Sherlock」。當「Sherlock」解決一眾事件後，發現原來整個犯罪事件中心擁有與足以與自己能力匹敵嘅犯罪型 AI「Moriarty」，雙方 AI 嘅推理對決就此展開。

遊戲玩法類似一般非對稱對抗遊戲，六人中一人扮演「兇手」，其中一人扮演「目標」，亦即係未來會被兇手殺害嘅受害者。扮演「Moriarty」嘅一方要殺人需要完成幾個條件，而「Sherlock」一方就係要阻止對方完成呢啲條件。喺對抗過程中，邊個係「兇手」邊個係「目標」會續漸明朗，搵到嘅線索會幫你慢慢收窄可疑人士範圍，到時就真係要睇下邊個捉鬼叻啲啦。

《CRIMESIGHT》預定於 4 月 15 日推出，對應平台為 PC Steam，對應繁體中文。另外，由即日起到 4 月 7 日，玩家可以去遊戲官網註冊試玩，啱玩先再決定買唔買啦。