【遊戲新聞】衰野接二連三發生《鬥陣特攻》官方頻道已被 Ban

暴雪自家出品嘅 FPS 遊戲《鬥陣特攻》曾經風頭一時無兩，不過後來因為營運、醜聞等問題導致遊戲熱度一落千丈，個人更試過家用機等三十分鐘都唔夠人開場，非常慘情。正所謂低處未算低，日前發生一件事，就係《鬥陣特攻》官方頻道被 Twitch Ban 咗，而且到本文截稿時間仲未解封。

Twitch 近年對於 Ban 台嘅準則越黎越難捉摸，雖然有進行說明及作出承諾，但係問題無改善，而且由舊年開始更成日亂 Ban 人，但點估到會 Ban 官方頻道。《鬥陣特攻》（OverWatch）官方韓國頻道喺 3 月 25 日開始喺無預警下被無故 Ban 台，原因亦只係寫話違反 Twitch 服務條款或社群規範。翻查 Twitchmetrics 資料，頻道一直都只有進行官方賽事轉播，而最後一次直播係 3 月 18 日，當日既賽事係 Talon 對 O2 Blast 嘅比賽，然後就被 Ban 台了。

一個官方頻道而且只係做賽事轉播，仲要係轉播自家遊戲比賽，到底要點樣先會違反規定呢點已經夠晒黑人問號，而仲會睇《鬥陣特攻》比賽嘅人基本上都唔會做觀眾檢舉呢類行為，再加上係韓國頻道就更令人摸不著頭腦（韓國仲有唔少人仲玩緊）。截至本文完稿時，頻道仍然係處於被 Ban 狀態，但係下個月《鬥陣特攻 2》就會展開 Beta Test，到時一定會有大量消息及直播活動需要用到官方頻道，如果到時未解封就真係衰上加衰了。

除咗上面呢單野，《鬥陣特攻》仲有另一個要面臨嘅問題。根據《華盛頓郵報》報導，自疫情爆發之後首個北美《鬥陣特攻》職業賽事（OWL）即將於五月正式回歸，亦係《鬥陣特攻 2》展開 Beta Test 後首批電競賽事之一，不過受到之前暴雪醜聞影響，包括可口可樂在內嘅主要贊助商全部都走晒，亦無計劃喺 2022 年回歸贊助，而且到現時為止 OWL 係未有任何贊助商的。新任負責人 Sean Miller 就表示有同潛在合作夥伴商議，但睇個勢都唔樂觀，斷估最後可能係叫微軟爸爸幫手。