由「生化危機之父」三上真司領軍的遊戲工作室 Tango Gameworks 最新作品《Ghostwire: Tokyo（鬼線：東京）》已經於 2022 年 3 月 25 日推出，為一隻動作 RPG，對應 PS5 以及 PC 平台。因為三上真司的名號，大家一開始對於遊戲都有頗高期待；不過遊戲推出之後暫時未算掀起好高話題性。

三上真司早前接受日媒 Famitsu 訪問時就表示，好希望改變大眾對於佢本人以及 Tango Gameworks 嘅刻板印象，認為佢地只會製作恐怖遊戲。

三上表示，佢唔會將《Ghostwire: Tokyo》定位為恐怖遊戲，實際上無論係《The Evil Within》系列以及《Ghostwire:Tokyo》，都係佢嘗試脫離恐怖遊戲界別嘅作品。雖然《Ghostwire: Tokyo》包含驅魔以及都市傳說等等元素，但係三上更會將佢定位為一隻動作遊戲。

三上又提到，自己過去製作嘅恐怖遊戲為佢帶來名氣以及地位，對此十分感激；但係，佢未來會想慢慢嘗試更多類型嘅遊戲作品，唔再將自己規限於「恐怖」界別裡面，亦未必會堅持「只製作 3A 大作」，反而會挑戰製作一些小品類別的作品。因此，佢未有打算將自己的工作室大型擴張，因為佢認為小型工作室反而會吸納到更多新人以及新想法，希望玩家對於佢地未來嘅動向繼續抱有期待。

《Ghostwire: Tokyo（鬼線：東京）》已經於 2022 年 3 月 25 日推出，對應 PS5 以及 PC 平台。