賽車遊戲通常分為幾類，一係就好似《Forza》咁玩純粹鬥快，一係就好似《Mario Kart》咁玩趣味性，再唔係就好似《GT》咁考驗耐性同容忍度，但今次介紹嘅賽車遊戲《Wreckfest》都唔屬於以上幾類，因為佢主要係玩「破壞」，鬥快不如鬥硬，睇下邊個比人炒爛先！

《Wreckfest》由 Bugbear 開發，係一款破壞系競速遊戲，支援多人連線遊玩。同其他賽車遊戲一樣，落場嘅目標都係拎第一名，不過賽道上嘅路線會相交，路上嘅車輛會發生碰撞，撞車後輕則被撞離賽道，重則會被撞毀，而且撞擊嘅力道係經由超真實嘅物理引擎模擬，真係可以邊玩邊唱「我要與你硬踫以爆裂極高速旋動」。

既然落場要玩撞車，咁落場前梗係要揀車先，車輛選擇非常多，由舊式美國重型車、歐洲車、日本車都有。揀完車就要做強化，而可供強化嘅選項非常之多，有加強保險槓、防滾架、側邊護板等等，內部零件都有空氣過濾器、凸輪軸、燃油系統等，而且外觀更會因此而改變，當然亦會實際影響車輛性能，唔係改黎無意思啦。

遊戲設有生涯模式，玩家可以一邊挑戰各大賽事，賺取資金及經驗逐步解鎖更多選項，最終挑戰成為世界冠軍，亦有挑戰模式，駕駛割草機、收割機、校車、三輪車等奇怪車輛歡樂 Play，又或者同朋友遊玩互相毀滅嘅多人模式，任君選擇。

《Wreckfest》Xbox、PS4 及 PC Steam 版已經推出，喺 Steam 版更有超過 2萬條評價，穩佔「極度好評」，而 Nintendo Switch 版則預計於今年 6 月 21 日推出。