《天能》呢套電影相信大家都有睇過，無嘅都應該睇過《寫實的天能》，兩套片都係講緊時間倒轉嘅概念，而呢個概念用黎做 Game 真係合適到爆。即將推出嘅新作《Relash》，就係用時間倒轉嘅概念，利用過去嘅自己所作出嘅行動，與現在正向時間流動嘅你，共同協力解開各種謎題，啱晒鍾意食腦嘅玩家！

《Relash》由日本獨立工作室 RetroGrade Games 製作，係一款動作解謎遊戲，採用第三身視點。遊戲中主角為咗逃離神秘設施而前進，喺呢個設施入面有數之不盡嘅獨立房間，要解開謎題先可以離開。但係要解開嘅謎題都係用普通手段無法解決的，例如要其他人幫手、又或者要顛倒程序等等，而每間房入面都會有個神秘裝置，當玩家進入設備時，時間就會開始倒流，好似睇片「回帶」咁，玩家就要利用呢個特性去逃出房間。

時間倒流同《天能》所描述嘅一樣，當人物進入設備進行「回帶」時，處於正常時間線嘅你係同時存在並能夠同時移動的，所以入設備前就要諗定跟住落黎嘅次序點先幫到自己。以下面嘅示範影片為例，先踩制解開踏腳台，再踩制開門的話，「回帶」時就會變成先開門再踩制解開踏腳台，咁樣係無法離開的。正確做法係要用「回帶」嘅思維，即係要先開門，再解開踏腳台，咁「回帶」時順序先會正確，而整個遊戲都要活用「回帶」思維，極之用腦。

謎題方面，除咗上面最基本嘅開門玩法，仲會有大型球體追殺、滿佈激光嘅關卡，再後面更會需要使用槍械，利用「回帶」槍機制玩嘅謎題真係十足《天能》味，非常值得期待。

《Relash》預計於 3 月 31 日發售，對應平台為 PC Steam。