「兇宅」呢樣野有人會避之則吉，有人會覺得多個人多雙筷無乜所謂，但相信大多數人都唔會選擇「兇宅」入住，但原來仲有「改頭換面」呢個選擇。新作《Haunted House Renovator》入面，玩家將扮演驅魔裝修師傅，專係幫「兇宅」執返靚仔，都幾得意。

《Haunted House Renovator》由 Image Power S.A. 開發，係一款恐怖模擬設計遊戲，採用第一身視點。玩家將扮演一位軀魔裝修佬，幫世界各地嘅客戶進行「翻身」工作，簡單講就係令到鬧鬼又或者有奇異事件發生嘅「兇宅」裝修，令到物業可以住返人，睇就好似好簡單，但係做起上黎一啲都唔容易。

要令到兇宅住得人，首先要知道間屋出咗咩事先。有時可能係簡單地鬧鬼，咁你只要用聖水、吸塵機驅魔就得，有時就要將物品歸位，但遇到強大嘅厲鬼就可能要繪製魔法陣再進行特殊儀式先搞得掂。厲鬼之外，有時更有透過簡單方法解決嘅惡魔之類，而你可以做嘅就係將惡魔入屋嘅通道用物件遮擋……睇唔到就當無事，最正係就算係同一種鬼怪都有多種方式對付，玩落真係幾過癮。

《Haunted House Renovator》推出日期未定，對應平台為 PC Steam。