《女神異聞錄》系列越來越受歡迎，而每集總會出現唔同嘅衍生作品，當中不乏品質優秀之作，例如今次做評測嘅《女神異聞錄 4 無敵究極背橋摔》（Persona 4: The Ultimax Ultra Suplex Hold），雖然最初版本喺 2013 年已經推出，但因為遊戲質素夠好，歷年來儲落唔少 Fans，而且世界最大型格鬥比賽 Evo 隔年就有相關比賽，係去到兩年前先無搞，證明品質上乘。

《P4U》今次再出返喺 PS4、Nintendo Swich 同 PC Steam 上，除咗提升畫面解像度、UI 之外，格鬥遊戲最重要嘅流暢度亦提升至 60Fps，仲包晒所有原本要付費嘅 DLC（P4U、P4U2 故事有晒），即係包含加入 RPG 元素、有最多新技能要素嘅「黃金競技場模式」，挑戰模式亦都已經係完全版（連招教學真心難，一般玩家應該難以應付），而且已經直接升到街機 Ver.2.50 版本，對格鬥遊戲有要求嘅玩家超顧到家。

玩落真心順，打都打得爽啲（PS4 版本）

遊戲基本系統係最傳統嘅 1 vs 1，由於係 Arc System Works 負責戰鬥部份，所以有玩過《BlazBlue》又或者上年出嘅《Guilty Gear -Strive-》會好快上手，熟悉嘅跳躍取消、連招中爆氣炸起對手等技巧喺本作一樣適用，另外打擊判定、Frame 數掌握等同樣嚴謹，絕非一隻只為滿足 Fans 嘅遊戲，純係想玩高質格鬥遊戲嘅玩家同樣啱玩。

戰鬥系統絕對嚴謹，絕非一隻只為滿足 Fans 嘅遊戲

登場角色全部都係來自 《女神異聞錄》三代及四代，基本人物有 22 位，但係大多數角色仲會有「陰影模式」，陰影角色不但體力更高，覺醒 SP 必殺技變成任何時間都可使用，仲有「陰影爆發系統」，但同時喪失「覺醒」、One More Brust、Max Brust 及一擊必殺，所以用法同原角係完全唔同，可視之為新角。

基本對戰以外，官方力推嘅「黃金競技場模式」就適合鍾意玩育成嘅朋友。玩家可以選任一角色開始，之後會由易至難地連續對戰，每打贏一場就會獲得相應經驗值，升級會學到新技能，有能力點數供玩家自由分配，練一隻啱自己玩法嘅角色「虐」返電腦轉頭。

「黃金競技場模式」有多個難度選擇，仲有得選擇參戰搭檔，練埋好感。

戰鬥系統夠晒「Hard Core」，但畢竟係《女神異聞錄 4G》衍生作品，劇情更加係講緊「真結局」後續故事，所以 Altus 為咗照顧對格鬥遊戲無興趣，又或者淨係想睇劇情嘅玩家設定簡易模式。簡單至齋撳正方鍵就會自動打出連招，又或者直接揀自動戰鬥等電腦幫你打埋都 OK，絕對唔會因為打唔贏而卡關。亦因為咁，唔想玩格鬥呢 Part 嘅朋友可以當佢係一本有聲電子小說，觀感 Fit 晒！

有超簡易連技齋撳正方鍵就會自動打出連招，如果連打都唔想打可以揀「Auto Mode」，電腦就會幫你打埋，格鬥苦手想睇劇情都無難度

總結：

《女神異聞錄 4 無敵究極背橋摔》雖然係 2013 年嘅作品，但係本身質素優秀已經有一班固定 Fans，今次又喺畫質流暢度上作出強化，對比現時嘅作品一啲都唔遜色，對《女神異聞錄》系列有愛嘅不論有無玩過都好值得入手。另外，本作係 Nintendo Switch 第二款《女神異聞錄》作品，買隻返收藏用都幾唔錯丫！

《女神異聞錄 4 無敵究極背橋摔》已經推出，對應平台為 PS4、Nintendo Switch 及 PC Steam。