對香港人黎講，「戰爭」感覺距離好遠，戰火所帶來嘅生命傷亡，無數家庭流離失所，凡此種種我哋都只能由書藉、相片中接觸感受。但係一般非主要戰場嘅地方，報導及紀錄相對會比較少，隨年月過去漸漸會被人遺忘。今次介紹嘅遊戲《台北大空襲》就係以當年少為人知嘅歷史為背景，希望透過遊戲方式去補完歷史，令新一代認識慘痛嘅過去。

《台北大空襲》由台灣迷走工作坊開發，係一款動作冒險遊戲，美術則有《十三機兵防衛圈》味道。故事講述 1944 年秋，二戰日本戰敗，當時仲係日本殖民地嘅台灣變得毫無防護能力，及後美軍派出 117 架 B-24 轟炸機前往台北進行轟炸。漫天戰火下，由玩家所扮演嘅失憶少女清子，與佢嘅小狗同伴小黑努力喺城中求生，但同時又怕就咁走咗去會同家人永遠分別，即使已經無佢哋相關嘅記憶。透過遊戲，玩家將會深深咁體會到戰爭嘅無情及殘酷。

遊戲主要玩法係操縱清子同小黑，喺危機中求生。場上會有多種機關以及不時出現嘅空襲，要盡力躲避之餘仲要尋找瓦礫中嘅道具、裝備，透過「躲避空襲」玩法，玩家將感受到二戰期間台灣人「走空襲」嘅擬真感受。更會遇到各式各樣人物，有日本留學生；有因為接受日本教育而擁有日本姓嘅台灣警官；有被灌輸喺台灣就「高人一等」嘅日本高級警察等等 ，喺戰火下嘅人際關係將比平時更為「微妙」。

故事所描述嘅「台北大空襲」其實係真實事件，當年嘅轟炸行動係台北市歷史上所遭受最大規模嘅空襲攻擊行動，罹災人數接近 28 萬人，非常慘烈。戰後由於中華民國政府喺歷史教育中大多強調抗日戰爭，對臺灣史少有著墨，因此台北大空襲喺教科書中未曾被提及，直接導致新一代人好多都唔知道呢段歷史，更有人以為當初係日本轟炸台灣。亦因為咁，製作團隊希望以遊戲令大家從新認識呢段歷史，並且會推出英文及日文版本，希望世界各地嘅人都知道發生過咩事。

《台北大空襲》早前透過「嘖嘖」募資，最終大超額以 28 倍金額達標。暫時雖然仲未有發售日期，但係已經開啟咗 Steam 商店頁面，並且支援繁體中文，大家可以先加入 Wishlist。另外，台灣著名歌手、演員鄭宜農為本作演唱主題曲〈終戰〉，幾好 Feel 架！