又為大家介紹「精神時光屋」類型遊戲啦，新作《ROMAN TRIUMPH Survival City Builder》玩傳說中嘅古羅馬時代，除咗要正常哋做城市規劃起屋起田之外，仲要安撫天上嘅眾神等佢哋唔好懲罰你班蟻民，又要準備各種防禦手段抵抗各種神話生物入侵，睇落幾得意。

《ROMAN TRIUMPH Survival City Builder》由 Coreffect Interactive 開發，係一款城市建造模擬遊戲。玩家要喺傳說中嘅羅馬時代中建立城市，建造農田、飼養牲畜等手段獲得食物，亦要建造房屋及各種工業建築進行生產，有多達五十多種建築可以興建，當然亦可以研發新技術增加更多設施，不過重點都係要令城中嘅市民生活得安全。

基本建設外，玩家可以透過貿易換取各類資源，亦可以透過更好嘅城市規劃吸引更多新市民移居至此。搞掂人民果部份之後，就要興建寺廟供奉神明，喺呢隻遊戲入面，宗教元素非常重要，因為一旦違反眾神嘅規則就會觸到神怒，然後就會發生莊稼被毀、雷擊、疾病等災難。

人民無事，眾神又安撫完，但因為城市越來越富足，入侵嘅風險隨之增加。來自北方嘅野蠻人會舉兵入侵，更會有九頭蛇、地獄犬、牛頭怪、三頭龍等神話怪物來襲，玩家要建造城牆、箭塔等防禦措施應對危機，透過升級解鎖技能樹就可以得到更多防禦科技抵禦外敵。

《ROMAN TRIUMPH Survival City Builder》預計於 2023 年推出，對應平台為 PC Steam。