今個月真係好多優質作品推出，不過因為《Elden Ring》大熱嘅關係，細廠出品就並未得到注意，今次介紹呢款遊戲《雙子星：盛氣淩人》（Young Souls）就屬於呢種。雖然係細廠出品，但係遊戲質素頗高，而且戰鬥系統做得非常唔錯，夠爽快兼有難度，建議大家收廠至 Wishlist 之後再玩。

《雙子星：盛氣淩人》由法國開發商 1P2P Studio 製作，係一款橫向動作角色扮演遊戲，最大支援單機二人合作（不過支援共享螢幕合作）。故事講述雙胞胎 Jenn 同 Tristan 自細痛失雙親，由好心嘅科學家教授收養扶持長大。好景不常，突然出現嘅傳送門令養夫失蹤，為咗救返佢兩位主角決定穿越傳送門前往未知世界展開探索。

戰鬥系統更接近於一般橫向動作遊戲，單人遊玩時可隨時切換操作 Jenn 或 Tristan，而且有各類型盔甲、配件、武器，亦會因應唔同武器有唔同動作。以配備劍、盾為例，主力打法係擋格架同盾反，可撥開敵人嘅招式，累績夠一定數值就會暈，呢個時後就可打出大傷害連招（有 Air Cobmo 添）。如果玩戟，攻擊距離會變得更長，配合魔法、必殺技能多種動作，玩起上黎的確好爽。

迷宮探索以外，玩家可以返人類世界行街，喺城鎮中自由探索購買道具，甚至可以去 Gym Room 做訓練提升各種數值，亦可以去買各種改變外觀嘅衣服。遊戲現時有多達數百種可裝備物品、數十個迷宮以及超過二十種頭目，內容豐富。

《雙子星：盛氣淩人》已於 3 月 10 日推出，對應平台為 Xbox One、PS4、Nintendo Switch 及 PC，同時已加入 Xbox Game Pass 陣容。