【遊戲新聞】Steam Deck 玩 NS 遊戲任記極速反應將相關影片下架

Valve 推出嘅新手提機 Steam Deck 可謂一機難求，不過外國有唔少訂到嘅玩家，而且仲立即試下可以點玩 Steam 以外嘅野。熱愛破解機種限制嘅 YouTuber ThePhawx，日前就用 Steam Deck 成功運行 PS2、PS3 及 Nintendo Switch 模擬器，但同 Switch 相關嘅影片上載無幾耐就被下架，反應極快。

Steam Deck 係一部使用 Steam OS 3.0 嘅手提遊戲機，可以透過修改系統令到 Windows 上大部份遊戲相容，而且 Valve 喺非常早期都有講過玩家可以自行安裝其他系統及遊戲平台，例如 Epic 又或者 Origin，因為講到尾佢只係一部遊戲特化小型 PC。ThePhawx 早前就分別上載以 PCSX2、RPCS3、Xemu 及 Yuzu 等模擬器分別遊玩 PS2、PS3、Xbox 及 Nintendo Switch 嘅遊戲，不但成功運行，而且效果都比原版更為優秀。

喺影片入面 ThePhawx 認為 Steam Deck 性能上有進步空間，但以現時機能運行 Switch 遊戲，不論畫面解析度、Frame 數都已經遠超原版，遊戲體驗更佳。加上 Steam Deck 同 Nintendo Switch 最平嘅版本只係相差 100 元美金，OLED 版更只差 50 元美金，撇除版權問題的話，成件事令人覺得玩 Steam Deck 體驗更好，相信呢點似乎係觸動任記底線，令佢哋快速行動將影片下架，話晒佢之前都有影片以其他機運行 Yuzu 甚至 Wii U 模擬器，但到而家都無被下架。

當然，以 Steam Deck 運行 NS 遊戲遭到下架嘅並非只有 ThePhawx 一位，大部份用 Steam Deck 測試玩任記遊戲機（GameCube、Wii 等）嘅 YouTube 影片，都已經被下架，只有 Reddit 等討論區仍有備份影片。但就算而家喺 YouTube 上面仍然有為數不少嘅 Switch、Wii 模擬器影片，又或者用任記遊戲裝 Mod 都無事，只要唔係透過相關行為賺錢、無提供 ROM 下載，基本上都係隻眼開隻眼閉。但無論點都好，唔係用正版途徑遊玩始終都係屬於侵權行為，絕不建議大家倣效。