每年都總會有幾隻殺手級別嘅遊戲，即係同佢撞期推出就預咗討論度低兼銷售數字低，例子有《Monster Hunter》系列、《Final Fantasy》系列等等，早前推出嘅《Elden Ring》以及今年推出嘅《薩爾達傳說 曠野之息 2》亦都明顯係呢類遊戲。事前備受期待，由知名白金工作室製作嘅多人合作動作遊戲《巴比倫的殞落》（Babylon’s Fall），就選擇喺《Elden Ring》推出後一個星期上市，最後落得慘死嘅結果……。
《巴比倫的殞落》標榜四人線上合作挑戰大型迷宮，戰鬥則以同時使用四把武器，可透過按鍵組合使出各種連技，加上由專出動作遊戲佳作嘅白金工作室（Platinum Games）開發，事前自然備受期待。遊戲經過多次延期後於 3 月 2 日推出，撞正超級大作《Elden Ring》熱潮，大量玩家仍然沉醉於宮崎英高嘅世界，對其他遊戲都係抱住「遲下先」、「睇定啲」嘅心態，呢點亦係《巴比倫的殞落》慘死嘅主要原因。
根據 SteamDB 公開數據，《巴比倫的殞落》發售首天最高高峰時只有 650 人，以一款大廠+名牌工作室嘅出品黎講真係少得可憐，但唔代表無人關注呢款作品，事實正好相反。喺推出首天 Twich 上面睇直播嘅人數有多達 3000 位，係當時熱門遊戲嘅 81 名，唔算太差。但作品擁有如 PS3 年代嘅畫面、垃圾劇情、過場極慳皮 Cut Scene、古怪嘅打擊感、擺明搶錢嘅微交易系統、鎖區，仲要收你 HKD $468，令本作成功地喺 Steam 得到「褒貶不一」的評價，喺各大媒體亦得到差評，真正實至名歸。
《巴比倫的殞落》慘死除咗檔期差之外，質素低劣絕對係主要原因，但其實眼紅《Elden Ring》熱潮嘅業內人士都不少。有網友喺 Twitter 上發現有一則討論，都係話玩家嘅遊戲體驗並不友善、電腦版有大量問題以及任務設計做得好差，而且仲得到媒體一致好評，而留下呢啲評價嘅分別係來自 Ubisoft 嘅 UX Director、Nixxes Software 嘅 Graphics programmer 以及《Horizon Forbidden West》嘅 Senior Quest Designer，事後當然將 Twitter 轉晒做私密狀態，但之前嘅對話已經比人 Cap 晒圖，喺外國就受到大量網友嘲諷話佢哋唔抵得人「紅」，但作為業界一份子，我哋都係祝賀《Elden Ring》嘅成功好過啦！
已被永久保存，Del 都無用
最正嘅係 Reddit 有人覺得「你講到自己咁勁，如果由 Ubisoft 開發《Elden Ring》會係點？」，之後就有位叫做 gamboozino 嘅網友整咗幅圖，入面有大量任務列表、追蹤進度、按鍵提示、小地圖常駐等等，非常親切，唔知你哋又覺得點呢？（雖然我覺得唔同類型遊戲無得比較啦……）
動漫電玩宅，極愛金田一系列，擅長動作及策略遊戲