烏克蘭正受到俄羅斯侵略，多個國家對呢個行為實施各種制裁，直接導致俄羅斯貨幣「盧布」貶值，勢估唔到呢個行動會連遊戲入面嘅貨幣都受到波及。極受 Hardcore 玩家歡迎嘅 MMOFPS《逃離塔科夫》（Escape From Tarkov），就因為現實各國制裁俄羅斯，連帶遊戲中嘅「盧布」大貶值，就連俄製槍械亦都受牽連，真係抵死。

《逃離塔科夫》由俄羅斯開發商 Battlestate Games 開發，採用第一身視點。由於遊戲戰鬥系統極為擬真，所有槍械都會受到射擊距離、子彈外彈道性能、武器精度、耐久以及配件嘅影響，加上唔會有 UI  顯示殘彈、小地圖等訊息，要拆彈匣出黎睇先知有幾多殘彈，亦有獨特嘅受傷系統。因為以上種種元素，令到本作係 Hardcore 玩家中極受歡迎。

喺《逃離塔科夫》，會用返歐元、美元、盧布呢啲現實貨幣單位做交易，而遊戲中貨幣嘅波幅經常性會與現實掛勾。最近因為俄羅斯嘅侵略行為導致盧布已經跌過三成，令到遊戲中嘅玩家必需須使用其他貨幣進行交易，而且變得相當困難，喺跳蚤市場，亦都淨返一頁頁美元同歐元嘅裝備買賣清單。

除咗貨幣大跌，槍械市場價格亦都受影響。由於有槍械不能賣比 Peacekeeper 同 Skier 呢兩位用美元及歐元嘅 NPC，令到有大量玩家直接將槍械以低價放上跳蚤市場碰運氣，但此舉會令槍械貶值。以 AKS-74UB 同 AK-74M 為例，佢哋已經分別下跌咗 37% 和 21%。另外根據網友資訊，盧布已經廢紙到要一千萬盧布先買到一把槍了。

現時仍處於 Beta 測試階段，但係現實俄羅斯央行已經將關鍵利率提升至 20%，此舉亦都意味住俄政府即將無錢通貨膨脹，亦都直接影響呢款遊戲持續發展嘅可能性。不過相比起呢款遊戲，我哋更希望喺之後嘅日子可以玩到《S.T.A.L.K.E.R. 2》，因為代表住烏克蘭嘅勝利（詳見）。