Valve 推出嘅新手提式遊戲機「Steam Deck」正式上市（不過無現貨），為咗配合新機上市，佢哋亦都推出一款搞笑嘅免費小品遊戲《光圈科學檢驗員》（Aperture Desk Job）。雖然係免費，但係質素絕對唔曳，推出短短時間就得到「壓倒性好評」，試玩過的確係幾過癮，而且喺電腦亦都玩到，正。

《光圈科學檢驗員》由 Valve 自家製作，係一款休閒模擬遊戲。玩家將扮演一位有夢想嘅新手產品檢測員，目標係不停向上爬，希望公司內部不斷向上攀升，而且本作係背景係延伸自《Portal》系列宇宙，有玩過嘅朋友一定覺得好親切。

至於玩法，基本上就係用「Steam Deck」上嘅各種按鍵去操作測試每種產品，所以 PC 玩家係需要插返隻手制先玩到。由於係一款搞笑幽默遊戲，所以要檢測嘅產品千奇百怪，連「武裝屎坑」都有，問你死未。

《光圈科學檢驗員》現已於 3 月 2 日推出，對應平台為 PC Steam，支援繁體中文，免費。