【遊戲介紹】實用技巧及小知識《Elden Ring》新手老手皆適用無劇透解說

相信大家都開始咗玩《Elden Ring》，但由於世界極之龐大，大家都應該仲係初期地圖探索（今次仲要有大量新手加入）。為咗令大家更快上手以及避免踩中前期超陰濕位，特別寫咗呢篇「實用技巧及小知識」，希望幫到大家更容易投入呢個迷人嘅世界（同埋降低棄坑率）。

選擇職業

開 Game 第一件事自然係揀職業，不過職業喺魂系遊戲入面只係初始點數及裝備嘅分別，所有其他職業裝備都可以喺遊戲中得到，無需太擔心「揀錯職」。新手想玩遠程魔法可揀「觀星者」、「囚犯」（初始只有近戰魔法）；物理近戰可選「流浪騎士」（有 100% 物防盾）、「勇者」有重量較高嘅戰斧，前期打小怪較輕鬆；想玩補血嘅可選「預言家」；對自己有信心嘅可選「一貧如洗」。特別一提係「密使」起始武裝已經有 100% 物防盾以及可回自身 HP 禱告，續戰力一流，「武士」則有武裝長弓，係打到中後期仍然有用嘅實用武器。

「一貧如洗」最高

想玩近戰嘅新手朋友，推薦使用「密使」，起始裝備好，又識自己回血，續戰力一流

新手禮物

每一名新角都可以揀選新手禮物，呢度建議大家選擇「石劍鑰匙」，該物品用於開啟特殊霧門，部份更可打開全新地區，加上獲得手段稀少，屬必揀之物。但如果想前期打得較輕鬆，可選「黃金種子」，只要喺賜福點揀選「聖杯瓶」即可增加使用次數，亦即係多支水用，對前期推圖有極大幫助。

「石劍鑰匙」可用於開啟特殊霧門，特別係大賜福地區入面有個位置拎禱告卷軸需要二條鑰匙，顯得更加重要

連線協力遊玩

今集難度可謂歷代之冠，為免大家棄坑，所以差唔多一開始就可以召人連機。第一步要先準備道具，方法好簡單，先去下圖位置搵商人購買「工具皮袋」（300 魂），再去附近收集黃色嘅「落葉花」，然後使用「製作物品」即可得到「喚勾指藥」，此乃召喚者必需品。

進入原野大地圖之後，對面已經係買道具嘅地方

第二步由被召喚者使用道具「褪色者勾指」寫下名字，然後召喚者係寫名地方附近使用「喚勾指藥」，等待一陣就應該會見到召喚印。另外，想淨係同朋友連機的話，可以喺「多人連線遊玩」中設定暗號，只有雙方設定同暗號先會見到對方嘅召喚印。

只要召喚者唔死，用一次「喚勾指藥」就可以無限召喚其他玩家

騎馬系統

由於使用開放世界，快速移動手段變得非常重要，所以建議玩家應先拿取座騎「靈馬」再進行探索。最安全及快捷取得座騎嘅路線如下圖所示，穿過密林就可以避開大路必經嘅軍營，只需要打少數敵人即可安全地拿取「靈馬」。另外，召喚「靈馬」後，只要按緊翻滾鍵即可進行衝刺，而任何時候都可以二段跳，前往較高位置。

騎乘攻擊

野外探索以騎馬為主，亦都因為呢個原因，絕大多數嘅野外王騎馬打得更為輕鬆，喺馬上可以施展魔法、射戰、使用道具，普攻就要預判，因應不同武器會有連擊次數、攻擊模式、範圍等分別。例如用大劍輕攻可劈三下、大斧兩下、巨劍一下，矛類則攻擊範圍小但可穿透盾牌（可能有誤，雖然未試過比人擋到），各武器揮砍前亦有不同嘅預備時間，建議熟習一把自己常用嘅武器。

打野外 Boss 多數都係騎馬打較為輕鬆

開啟地圖

地圖上出現下圖符號就代表該處有地圖拾取，獲得後將解鎖地圖樣貌。

前期極易中伏超陰濕位

有「靈馬」後四處探索係人之常情，但係前期有個地方絕對唔好亂去，否則隨時令你棄 Game。呢個地方位於初始地區湖中央「龍息廢墟」，有個位置可以向下層移動，盡頭有一寶箱，打開後會中傳送陷阱，會將玩家傳送至高等地區「瑟利亞結晶坑道」，而呢個地區出現嘅怪物「龍蝦怪」極之麻煩兼嘔心，並且不能使用快速移動，除非你脫離坑道，新手誤入的話絕對會係棄 Game 契機。

新手切忌誤入

靈體召喚

今集新系統「靈體召喚」，顧名思義係召喚靈體為自己作戰，獲得途徑多數都係擊敗 Boss 後得到，裝備後需於左方有墓碑符號出現時先可以使用（一般都係打王、強敵時出現）。前期可得到嘅靈體以「狼群」及「水母」最強，前者係召喚三隻狼喺一定時間內為你而戰，每隻狼有自己血量，速度快攻擊頻率高存在時間耐，而且會令敵人產生小硬直，非常實用；後者係召喚一隻水母，持續對單一目標施毒，最適合打王用。

水母打王非常好用

強韌度、崩值

魂系遊戲入面每位敵人都有「強韌度」數值，越高就越難打「窒」對方。基本上越重嘅武器打擊敵人就越大「崩值」，亦即係越易打「窒」對方。但由於武器越重揮擊動作越慢，自然使用難度越高，所以玩家應該揀選啱自己手型嘅武器。

巨劍基本上可打窒大部份小怪，但係揮擊動作極慢，唔易使用

Boss 戰注意事項

承上，絕大多數嘅 Boss 強韌度都非常高，所以咁多年來魂系遊戲主要打法都係「破招」。即係先熟悉 Boss 每一招起手、後續攻擊次數、出招後硬值時間等等，再睇準招式間隔攻擊。另外，視乎武器有不同攻擊發生時間，後搖硬值等等亦要計算在內，切忌「貪刀」、「搶攻」。

絕大多數 Boss 強韌度都非常高，所以應該先睇清招式套路後先攻擊

戰技使用

「戰技」係今集核心系統之一，每把武器都可以綁定一招戰技，可於鐵匠處更換。戰技可視之為「必殺技」，部份需要消耗 FP，強力戰技如「落雷」、「輝劍圓陣」都係非常推薦使用。另外，如果覺得持盾敵人好麻煩的話，可選擇綁定破盾防專用戰技「踢擊」，對擋架中敵人使用後會露出極大破綻，可立即使用「致命一擊」，並且不耗 FP，可無限使用。

神技「踢擊」破防

防禦反擊

配備盾牌後的強力反擊技，雖然遊戲中並無相關教學。使用方法為擋格敵人後立即按重攻擊，成功的話會施展比平常揮刀速度快嘅重攻，命中低韌性敵人的話會做成極大硬直，可立即施以致命一擊，而且此技不耗 FP。但要注意一點，使出時並無任何無敵時間，如果唔係準確掌握敵人攻擊次數、頻率的話反而會中招，但仍然係極實用技巧，配以「施展致命一擊回復 HP」護符簡直係推圖神物。