【遊戲評測】對新手最友善一集《Elden Ring》同時亦係最具挑戰性最易棄坑一集

萬眾期待嘅超級大作《Elden Ring》（艾爾登法環）今日正式推出，魂系玩家自然係必入，相信有唔少未接觸過宮崎英高作品朋友慕名嘗試，更有部份玩家抱住睇定先嘅心態。我哋有幸喺較早時段獲得優先遊玩資格，以一位資深魂系玩家嘅角度為大家進行講解。

入正題前正路都會講下畫面，我係以 Xbox Series X 版本遊玩，整體畫面及流暢度令人非常滿意，而新世代主機嘅光追效果驚艷。另外，雖然預設係「畫面更新率優先」，但切換至「畫質優先」後，FPS 仍處於可接受範圍，值得一讚（不過我都係建議 FPS 行先，話晒流暢度比較重要）。美術表現則比以往作品用色更為「正面」，天晴時更會有藍天白雲，相信一眾埋首於「病村」等黑到核爆地區玩家會好唔習慣。與舊有作品不同，遊戲中有日夜、天氣變換系統，有部份 Boss 更只會於特定時間出現。

畫面表現出色，特別係火焰效果華麗

部份 Boss 只會於特定時間出現

今次係 FromSoftware 首個採用開放世界嘅魂系遊戲，野外有大量野生動物（可擊殺）及採集物，玩家需要打獵去拎素材製作各類有用物品。喺平原活動亦都較少出現偷襲情況，加上主要係騎馬移動，較為輕鬆，但係當進入洞穴、城堡等地方後依然會有大量「驚喜」位置，老玩家可安心享用。另外，為咗方便探索，大幅放寬高處落下損血機制，不過太高的話仍然係會死的。

「驚喜」位絕對唔少，多多留意地上「善意」嘅留言吧

有玩過《Dark Souls》嘅玩家都知道「職業」呢樣野只係初始點數及裝備嘅分別，喺《Elden Ring》亦唔例外，所有其他職業裝備都可以喺遊戲中得到，無需太擔心「揀錯職」。至於老手們可以跟隨宮崎英高嘅建議，以「一貧如洗」開始遊戲感受「善意」，絕對別有一番風味。但喺呢度都比個建議大家，新手禮物盡量選擇「石劍鑰匙」，該物品用於開啟特殊霧門，部份更可打開全新地區，加上獲得手段稀少，屬必揀之物。

新手禮物盡量選擇「石劍鑰匙」，遊戲中極難入手

戰鬥系統同以往作品大同小異，主要都係沿用《Dark Souls》系列操作，新加入《隻狼》式跑步及跳躍，跳躍中攻擊同時做成更大硬直及傷害，打王時可睇準機會使用。由於加入跳躍動作，部份王會使出必需用跳躍閃避嘅招式，例如前期野外王「大樹守衛」炸地，用跳比起翻滾更安全。

部份 Boss 炸地招式，用跳躍避開比起翻滾更安全

野外探索以騎馬為主，亦都因為呢個原因，絕大多數嘅野外王騎馬打得更為輕鬆，喺馬上可以施展魔法、射戰、使用道具，普攻就要預判，因應不同武器會有連擊次數、攻擊模式、範圍等分別。例如用大劍輕攻可劈三下、大斧兩下、巨劍一下，矛類則攻擊範圍小但可穿透盾牌（可能有誤，雖然未試過比人擋到），各武器揮砍前亦有不同嘅預備時間，建議熟習一把自己常用嘅武器。

野外探索主要係騎馬，就算面對巨神兵呢類大型怪物，識得預判揮刀，其實打得好輕鬆

以往魂系作品玩魔法被喻為「Easy Mode」，去到今集魔法依然強勢，初始魔法已經有「追尾」性能，之後買到嘅魔法「輝石流星」更會識 270° 轉向，極之誇張。不過，為咗令魔法玩家感受「宮崎英高的善意」，部份 Boss 識反射魔法，即係純魔法玩家都要學習打物理近戰。最絕嘅係今集更改增加記憶魔法空格方法，要喺地圖搵到總數只有八個嘅「記憶石」，第一個位於「接肢」Boss 之後嘅地圖，而呢隻王嘅難度已經有《Dark Souls 3》中後期 Boss 級數，絕對係令新手棄坑一大難關，所以玩魔法嘅玩家請先做好心理準備……。（信仰就加埋暗術、咒術變為「禱告」）

單挑的話，呢隻 Boss 唔會差得過《Dark Souls 3》蓋爾爺爺，然後佢只不過係主線第二隻王

王嘅難度偏高，路上嘅小怪亦唔弱，前期主線「史東薇爾城」選擇正門強攻的話，難度絕對不比《Dark Souls 3》洛斯里克城低，而突破此地區後嘅「卡利亞城」難度再進一步上升，整體難度可謂歷代之冠。雖然難度夠晒高，但係今次對新手亦都真係友善，因為今集連線接近係「零代價」。以往作品都要用難以入手嘅「人性」、「靈視」等道具方可召喚其他玩家，今集只需要用「喚勾指藥」即可（只要 Host 唔死，用一次就可以無限召），而獲得方法極簡單，先購買「工具皮袋」（300 魂），再用「製作物品」即可得到（箭、飛刀、火焰瓶亦可製作），材料亦係隨處可見嘅「落葉花」，可見官方對新手真正嘅「善意」，不過想感受魂系遊戲嘅魅力，都係建議一周目單人通關。

工具袋差唔多係一開始就買到，製作材料就多到一地都係，簡直係歷代最友善召喚機制

今集新系統之一「靈體召喚」，顧名思義係召喚靈體為自己作戰，獲得途徑多數都係擊敗 Boss 後得到，裝備後需於左方有墓碑符號出現時先可以使用（一般都係打王、強敵時出現）。前期可得到嘅靈體以「狼群」及「水母」最強，前者係召喚三隻狼喺一定時間內為你而戰，每隻狼有自己血量，速度快攻擊頻率高存在時間耐，而且會令敵人產生小硬直，非常實用；後者係召喚一隻水母，持續對單一目標施毒，最適合打王用。

留意每次召喚靈體只能召喚一次，不論類型，而且靈體死後於同一墓碑地區都不能再召任何靈體。

今集另一主力系統為「戰技」。雖然以往《Dark Souls》系列都有類似動作，但威力、實用性等都遠遠不及。以戰技「落雷」為例，綁定可鎖定遠方敵人雷擊，傷害與重攻擊相約，FP 損耗低，極之實用。

戰技不但實用，變更戰技後更會連令戰法改變。遊戲過程中只要得到「戰灰」，即可去鐵匠處與武器綁定新戰技，之前試玩版神技「輝劍圓陣」，喺自身四周召喚五把魔法劍殺敵，PvP 與打王佳品。另外，綁定戰技後可選擇改變武器屬性及加成，如混種大劍綁定「輝劍圓陣」後可選擇追加魔攻降低物攻，力量加成亦會變化（類似質變）。

綁定戰技後可選擇改變武器屬性及加成，亦可以乜都唔變用返原有數值

以往破盾防專用技能「踢擊」，喺呢度變成戰技，雖然無其他戰技威力咁強，但勝在不耗 FP，可無限使用

武器有戰技，配備盾牌亦有強力反擊技，雖然遊戲中並無相關教學。使用方法為擋格敵人後立即按重攻擊，成功的話會施展比平常揮刀速度快嘅重攻，命中低韌性敵人的話會做成極大硬直，可立即施以致命攻擊，而且此技不耗 FP。但要注意一點，使出時並無任何無敵時間，如果唔係準確掌握敵人攻擊次數、頻率的話反而會中招，但仍然係極實用技巧，配以「施展致命一擊回復 HP」護符簡直係推圖神物。

超好用盾反擊技，使用方式簡單回報率高

劇情方面，有《Game Of Thrones（小說原譯：冰與火之歌）》原作者 George R.R. Martin 創作世界觀，故事細節以及對白文本等等則由宮崎英高負責撰寫。根據之前 George R.R. Martin 所講，佢以為會係一個溫暖及充滿人性化的故事，實際遊玩後發現不論角色設定、世界觀等都貫切宮崎英高本色，黑暗得黎引人入勝，不過為免劇透，留待大家自行探索（不過搵到火果下係幾溫暖）。但有一點可以肯定，就係本作同《Dark Souls》絕對係同一世界觀，詳情請看下圖。

總結：

《Elden Ring》擁有絕大多數《Dark Souls》系列受歡迎元素，魂系玩家一定滿意，但對於新入坑嘅朋友，難度真係未免太高，即使當佢係 APRG 咁農 LV，單打的話最盡應該去到城主就棄坑，估計爆機率隨時低過《隻狼》，但對於愛挑戰嘅玩家黎講，絕對滿意。

對比《Dark Souls》系列，個人認為有兩個地方係比較遜色。第一點係地圖構成，雖然採用開放世界，可探索地方多到嚇死人（要全地圖探索估計兩星期走唔甩），但亦都令到本作無以往魂系果種地圖連貫性、緊密性，以往場景切換嘅心情係由一個地獄跳去一個地獄，Keep 住緊張。黎到《Elden Ring》即使之前嘅緊張都好，當進入原野大地圖就可立即放鬆（中後段會開始較緊張，但仍無室內場景果種壓逼感），對一般玩家可能係抖氣位，但對自虐玩家黎講就並非好事（不過理解劇情之後就明白點解要將地圖畫得咁大）。