今個月雖然有海量大作推出，但係鍾情日系角色扮演遊戲嘅玩家又真係無乜選擇，如果你都係咁的話，不如試下今次介紹嘅遊戲《Small Saga》。呢款採用像素風格嘅作品，充滿濃厚舊式日系 RPG 味道，但係動畫演出、系統等又有現代水平，絕對值得留意！

《Small Saga》由英國獨立製作人 Jeremy Noghani 開發，係一款回合制角色扮演遊戲。故事講述老鼠們住喺地底世界，地上世界則稱之為「天堂」，上面住嘅都係「神」。玩家所扮演嘅老鼠「Verm」因為好奇心下與好友前往「天堂」（即係超級市場），上去無耐就被人類發現，急於逃生嘅情況下誤踩捕鼠夾，為咗逃命只好揮劍斬斷自己條尾求生。之後，Verm 繼續踏上旅途，除咗會遇見同伴之外，更會正面挑戰天敵「貓」，劇情都算幾有趣。

戰鬥系統採用回合制，暫時指令只有攻擊、防禦及使用道具三項，略嫌簡單。另外，本作並無 MP 值，改為使用能量點數。每次施放攻擊會因應技能消耗相應點數，例如普攻消耗一點、較強技能消耗兩點，並且每回合回復一點能量值。由於每名角色能量點數值不同，每回合角色行動都需要考慮策略運用（雖然試玩版極簡單，根本唔需要諗）。

遊戲系統簡單易明，升級成長要素亦都做得非常直接。儲夠經驗值升 LV 後，就可以直接係技能一項進行能力強化、解鎖新技能、增加能量點上限等等。另外，雖然採用像素風格，但係戰鬥畫面及演出做得非常唔錯，音樂亦都配合得幾好，值得一讚。

《Small Saga》現時由即日起至 3 月 1 日，於 PC Steam 平台開放限時試玩體驗，有接近一小時內容可玩，有興趣嘅朋友可到頁面下載。