FromSoftware 於 2022 年 2 月 25 日推出的魂系開放世界動作 RPG《艾爾登法環（Elden Ring）》自從公佈以來，一直受到玩家熱烈期待，一來係因為 FromSoftware 出品幾乎是信心保證，二來係因為「魂系」遊戲折磨人嘅高難度動作體驗、以及 FromSoftware 慣常使用的迂迴敘事手法，絕對係令玩家又愛又恨的獨有體驗，遊戲界更有為工作室負責人宮崎英高設計了專有名詞：宮崎英高的善意，去代表「魂系」作品裡面滿滿的埋伏與黑暗世界觀。

有玩過《Demon Soul》、《Dark Souls》系列、《Bloodborne》甚至《SEKIRO 隻狼》嘅玩家，相信都會對遊戲裡面經常出現嘅濕地／沼澤地形有深刻印象，例如係《Darks Souls》裡面嘅屎黃色沼澤區、或者《SEKIRO》裡面嘅沼澤區等等，一大片濕淋淋嘅未知版圖，到底於水中潛伏多少敵人，沼澤到底會扣血定係有毒，無論係邊一種設定，都令到玩家一步一驚心。

宮崎英高早前接受外媒 Game Informer 訪問時就表示，《Elden Ring》裡面乜野風格嘅地圖版形都會有，當然會再次出現沼澤地形（編按：仲要好大，附近仲有個好嘔心嘅礦洞！！）以及濕水區等等設定。宮崎英高笑言，因為佢真係好鍾意「沼澤」帶有嘅未知性以及危險性，所以每次整遊戲，都會有衝動要製作「有毒沼澤區」嘅想法。佢更表示，「每次都係整到一半先發現，噢，自己又整左有毒沼澤了！我自己都控制唔到自己！」咁話。

不過，「宮崎英高的善意」於《Elden Ring》裡面有另一種方式嘅展示（編按：嗯，你懂的），因此是次作品裡面的沼澤區域比起前作算係溫和了不少，不一定有毒，可能只是單純的地形展示；加上今次玩家可以召喚靈馬作代步工具，於開放世界地圖上危害你生命的，又點會停留喺有毒沼澤呢一點……相信大家一定對遊戲充滿萬分期待，係咪？