玩過 MMORPG 既朋友相信都有打過副本，但係九成以上副本喺打王前都要打一大堆小怪，當然有時係為咗拎 Buff，不過都會幻想下如果有得淨挑戰 Boss 應該都幾快樂。新作《TrinityS》就係一款齋打王嘅動作角色扮演遊戲，唔需要再打小怪，滿足打王慾望。

《TrinityS》由日本獨立遊戲團隊 Indie-us Games 開發，係一款動作角色扮演遊戲，最大支援三人線上同遊。雖然係角色扮演遊戲，但係就淨係扮演打王果部分，因為主要玩法係「Boss Rush」，即係不停於唔同版圖打唔同嘅 Boss。

雖然只有三人連線合作顯得有啲「流」，但係職業都盡量跟返 MMORPG 常見嘅「坦」、「補」、「魔」三職，當然更希望後續會加入弓手、盜賊等職啦。至於打法亦都類似《WoW》咁，坦拉仇恨坦傷、補就睇血、魔負責打 Damage，頭目亦會有唔同嘅行動模式，玩家要適時走位躲避招式。

遊戲目前已經有免費體驗版，體驗版將包含兩關卡供玩家挑戰，可選擇多人線上合作模式或者單人模式。不過由於版圖細少亦欠缺可互動嘅物品感覺有點簡陋，但係概念算唔錯，希望正式版會增加更多元素。

《TrinityS》預計於 2022 年推出，對應平台為 PC Steam。