著名恐怖動作遊戲《生化危機》（Biohazard）系列推出多年後，先後將二代及三代重製成「Re」版並取得巨大成功，會繼續重製其他集數都係意料中事（幾時有初代？）。日前「生化危機之父」三上真司接受外媒訪問時就提及到《生化危機 4》代重製的話，希望 Capcom 可以重寫劇情，與此同時有外媒爆料四代重製版消息，如果屬實就真係皆大歡喜了。

Photo Via VG247

根據外媒 VG247 訪問，三上真司表示 Fans 們係好想見到《生化危機 4》重製，絕對係一件好事，但如果 Capcom 可以令故事變得更好，咁就完美啦。三上真司咁講原來係有佢嘅理由，當年撰寫《生化危機 4》劇本嘅時間原來只有短短三個星期，佢亦都坦言係一次非常艱難嘅開發經驗。至於佢提及改寫劇本嘅建議，過去 Capcom 的確有試過喺重製版改寫故事（Re2 & 3 都有），即使只係輕微嘅改動。

與此同時，多個外媒引用 fanbyte 一篇四代重製爆料報導，內容係會將四代村莊由日間改為晚上增加恐怖感，並會對故事進行修改，會增加配角更多戲份及登場時間，Ada 戲份亦會增加，並會整合 GameCube 版本幫 Wesker 收集樣本嘅「Assignment Ada」及 PlayStation 2 與所有後續版本嘅「Separate Ways」，變為一個更完整細緻嘅篇章。

另外，製作該項目嘅單位由原本嘅 M-Two（Re 3 工作室） 改為《生化危機 2 重製版》嘅工作室負責，前者則變做支援角色。不過以上嘅消息全部都係來自該篇爆料報導，Capcom 對此暫時未有回應。

更巧合嘅，喺情人節當日，Capcom 開咗個神秘倒數網站「Capcom Countdown」，網站只有一個倒數時計，時間指向香港時間 21 日下午兩點，並無其他資訊。到底會唔會就係《生化危機 4 重製版》發表，定係其他大作如《Street Fighter 6》等遊戲公開，大家一齊等睇啦！