市面上可以比大家玩「砌模型」嘅遊戲基本上得《Gundam Breaker》 一款，問題係對上一隻伏到……令到玩家對新作無信心，而且大家心目中最想要嘅應該係可以真真正正地組裝模型。日前推出嘅新作《Model Builder》就係一款比玩家落手落腳砌模型嘅遊戲，由剪件到上色每個工序都要落手做，最緊要係成品唔需要再怕比人整爛了……。

《Model Builder》由 Moonlit S.A. 與 Kuba Wójcik 合作開發，係一款休閒模擬遊戲。喺生涯模式中，玩家為咗繼承爺爺嘅成就，透過不斷接受任務委託及參加比賽，賺錢擴充工具、零件等等，一步步成為模型大師。遊戲會提供製作教學，玩家可從中學習到各種組裝模型嘅必備技能，亦有提供零件、水貼等等比玩家發揮創意，當完成後可以放入展示櫃中拍照分享。不過現階段部份組裝細節未算做得好好，例如打磨、無縫等技術，主力放於上色，希望之後可以強化其他部份。

作為一隻砌模型 Game，有咩模型砌自然係重點。登場嘅種類以軍事模型為主，飛機、坦克、船艦等自然唔少得，星戰光劍、戰棋、甚至係「仿」Gundam 嘅模型都有出現。相信大家都係想主力砌高達作品模型，但因為版權問題應該無乜機會實現。不過現時玩家群正要求製作團隊開放工作坊，由玩家自製模組的話就可以走灰色地帶，到時就有得玩啦。

《Model Builder》已於 2 月 9 日推出，對應平台為 PC Steam。