有睇過《刀劍神域》嘅，相信都好嚮往果種完全潛入遊戲玩法，不過現實科技要實現呢種玩法應該都唔係短時間做到，不過簡化版嘅雛型而家已經玩到。已經做咗成年 Beta Test 嘅 VRMMORPG《Zenith: The Last City》日前正式推出，雖未去到完全潛入，但係打怪、生活技能等系統已經非常接近《刀劍神域》入面所描寫嘅概念，更喺短短時間內已得到「極度好評」評價，真係可以試下做桐人了。

《Zenith: The Last City》由 Ramen VR 開發，係一款 VR 專用大型線上角色扮演遊戲，採用第一身視點。遊戲最大特色係佢嘅戰鬥系統有別於傳統  VR 動作遊戲，玩家要睇準時機擺出特定「架式」先可以施展各種劍技，仲要跟返節奏進行攻擊及防禦，亂 Fing 的話只會打唔出漂亮數字，仲會做成空隙令敵人有機可乘。

作為一款 MMORPG，自然有大量生活技能，但係為咗令玩家更投入，所有生活技能例如係烹飪、鍛鍊等工作都要落手落腳做，唔再係打開 Menu 撳幾粒掣就搞掂，呢種做法再加埋 VR 視角，自然真實感大增。

由於遊戲已經做咗成年 Beta Test，玩家群、組隊、公會等系統已成熟，唔怕無人一齊玩。開發團隊亦都表明目前遊戲只係有核心部分，之後仲會 Keep 住更新，有得起屋、PvP，追加更多職業、魔法及道具等，務求令大家更沉迷。

《Zenith: The Last City》正式版已於 1 月 28 日推出，對應平台為 PSVR、PC Steam 及 Oculus。