由白金工作室開發的《Bayonetta 3（魔兵驚天錄 3）》預計 2022 年推出（報導），對應平台為 Nintendo Switch。

工作室領軍人以及《Bayonetta 3》遊戲總監督早前接受外媒 IGN Japan 訪問時表示，由於三集故事有所關聯，強烈建議玩家於遊玩第三集之前，率先完成頭兩集遊戲，如果唔係絕對唔知故事講緊乜，亦都未能夠 100％ 感受《Bayonetta 3》嘅樂趣。

佢又表示，《Bayonetta 3》相比前兩集，無論係戰鬥畫面、關卡設計、頭目設計都更為創新，當中更有唔少敵人模組係前兩集未出現過的；當然亦會有向前兩集致敬以及首尾呼應嘅部份，所以假如玩過前作嘅玩家，相信會對《Bayonetta 3》產生更多共鳴。

《Bayonetta 3》於 2017 年首次公佈，及至近年推出遊戲畫面，一度被玩家批評 B 姐全新造型有大媽化趨勢，於 Fami 通上「最受玩家期待遊戲」亦都隨住片段公開而名次大幅下滑；到底一度被稱為「經典」嘅《Bayonetta》系列能否再創高鋒，都係玩家們相當好奇嘅議題。

任天堂於 2018 年 2 月推出《Bayonetta 1+2 》合集，有興趣嘅玩家可以到 e-Shop 入手。《Bayonetta 3》暫時未公佈確切發售日，有新消息會再為大家報導。